Արմինֆո.Հայաստանում ԱՄՆ դեսպանատունը հերքում է ԱՄՆ-ի կողմից Հայաստանում մահացու վտանգավոր վարակների հետազոտման ծրագրի ընդլայնման մասին տեղեկատվությունը:
Մի շարք հայկական լրատվամիջոցներ տարածել են տեղեկատվություն այն մասին, որ ԱՄՆ-ն ընդլայնում է Հայաստանում մահացու վտանգավոր վարակների հետազոտման ծրագիրը։ Նշվում է, թե, իբր, Պենտագոնի ներկայացուցիչներն անսահմանափակ հասանելիություն ունեն Հայաստանի ռեսուրսներին կենսատեխնոլոգիական հետազոտությունների ոլորտում եւ մտադիր են ընդլայնել ռազմա-կենսաբանական գործունեությունը Հայաստանում՝ ընդհուպ "մարտական վարակների" մշակումը:
Այդ առնչությամբ ԱրմԻնֆո-ն հարցում է ուղարկել ԱՄՆ դիվանագիտական ներկայացուցչություն' ստուգելու տվյալ տեղեկատվության հավաստիությունը: ՀՀ-ում ԱՄՆ դեսպանատանը, մասնավորապես, նշել են. "Վերը նշված հրապարակումներն ընդհանուր ոչինչ չունեն իրականության հետ: Միացյալ Նահանգների և Հայաստանի միջև ձևավորվել է համագործակցություն երկկողմ օրակարգի լայն շրջանակի ՝ տնտեսական, քաղաքական, դատական և անվտանգության հարցերի շուրջ"։
Միաժամանակ, դիվանագիտական ներկայացուցչությունում հիշեցրել են, որ 2008 թվականից ի վեր փոխգործակցությունը ներառում է նաեւ աջակցություն հայկական լաբորատորիաներին, որոնք կենսական նշանակություն ունեն հիվանդություններ հայտնաբերելու եւ մեկուսացնելու Հայաստանի ունակության բարելավման համար: "Օրինակ, COVID-19-ի անկախ թեստավորումը և հետազոտությունը Հայաստանում, լաբորատոր կենսանվտանգության և կենսապաշտպանվածության բարձր մակարդակի պայմաններում՝ կանխելով հիվանդության փոխակերպումը համավարակի: Բոլորին քաջ հայտնի է և բազմիցս հրապարակավ հայտարարվել է, որ դրանք տեղական լաբորատորիաներ են, որոնք կառավարվում են հայ մասնագետների կողմից, և Հայաստանի կառավարությունն ինքնուրույն է վերահսկում լաբորատորիաների հասանելիությունը", - ամփոփել են ՀՀ-ում ԱՄՆ դեսպանատանը։
Հիշեցնենք, որ 2016 թվականին ԱՄՆ ՊՆ-ի ֆինանսավորմամբ Հայաստանում բացվել է երեք լաբորատորիա ՝ Երեւանում, Գյումրիում եւ Իջեւանում։ Դրանց բացումից հետո հայկական և ռուսական ԶԼՄ-ներում պարբերաբար հրապարակումներ են տարածվում այն մասին, որ այդ լաբորատորիաները երկակի նշանակության օբյեկտներ են և կարող են օգտագործվել ռազմական նպատակներով կենսաբանական զենքի ստեղծման և արտադրության համար ։ Երեւանում ռեֆերենս-լաբորատորիայի ստեղծման համար ԱՄՆ ՊՆ-ն հատկացրել է 15,5 մլն դոլար, իսկ ֆինանսավորման ընդհանուր ծավալը կազմել է 18 մլն դոլար:
Երեւանում, ՀՀ գյուղատնտեսության նախարարության հատուկ վտանգավոր պաթոգենների համար սննդամթերքի անվտանգության բաժնի ռեֆերենս լաբորատորիայի ամբողջական կառուցման համար ներդրվել է 4.1 մլն դոլար, իսկ ՀՀ առողջապահության նախարարության "Հիվանդությունների վերահսկման եւ կանխարգելման ազգային կենտրոնի" ռեֆերենս լաբորատորիայի վերանորոգման համար ԱՄՆ կառավարության կողմից ներդրվել է 9.8 մլն դոլար' ապահովելով շենքի սեյսմակայունությունը եւ ստեղծելով անհրաժեշտ լաբորատոր ենթակառուցվածք: Երկու լաբորատորիաների համար էլ լրացուցիչ 1,7 մլն դոլար է հատկացվել նոր սարքավորումներ եւ կահույք ձեռք բերելու համար։
Ուշագրավ է, որ Մոսկվան եւ Երեւանը հայտարարել են, թե դեռեւս 2018 թվականին սկսել են աշխատել Հայաստանում ամերիկյան կենսալաբորատորիաներ ռուս մասնագետների մուտքի մասին փաստաթղթի վրա: Ավելին, 2019 թվականի նոյեմբերի 11-ին Երևանում Հայաստանի և Ռուսաստանի արտաքին գործերի նախարարները համատեղ մամլո ասուլիսում հաղորդել են այդ ուղղությամբ աշխատանքների ավարտի և երկու երկրներում միջգերատեսչական մակարդակով փաստաթղթի համաձայնեցման ակնկալիքի մասին: Սակայն դրանից հետո այդ հարցի շուրջ բոլոր խոսակցությունները դադարել են։