Ուրբաթ, 3 Ապրիլի 2020 10:30

Արմինֆո. ՀՀ ԱԳՆ - ն կրկին կոչ է արել իր քաղաքացիներին հրաժարվել ցամաքային ճանապարհով հայրենիք վերադառնալու փորձերից:

 

<Վերստին հիշեցնում ենք, որ Ռուսաստանից Հայաստան վերադառնալու համար մեր քաղաքացիները չեն կարող օգտվել ցամաքային ճանապարհից, որը փակ է մարտի 18-ից: Վերին Լարսի անցակետը բաց է բացառապես բեռնափոխադրումների համար։

Կորոնավիրուսի դեմ պայքարի շրջանակներում տարբեր երկրների կողմից կիրառվող սահմանափակումների և արտերկրում գտնվող մեր քաղաքացիների տեղաշարժերի հնարավորությունների մասին տեղեկատվության համար խնդրում ենք բացառապես օգտվել պարետատան, Արտաքին գործերի նախարարության և արտրերկրում ՀՀ դիվանագիտական ներկայացուցչությունների կողմից տրամադրվող հաղորդագրություններից>,- նշվում է COVID19 սահմանափակումների վերաբերյալ ԱԳՆ հայտարարության մեջ։

 

Նշենք նաև, որ դժվարացել է նաև քաղաքացիների վերադարձը հայրենիք օդային ճանապարհով։

 

Այսպես՝ նախօրեին մի խումբ քաղաքացիներ մնացել էին Մոսկվայի "Դոմոդեդովո" օդանավակայանում ՝ դեպի Երևան չվերթի հանկարծակի չեղարկման պատճառով ։

 

Այս առնչությամբ պարզաբանումներով է հանդես է եկել ՌԴ-ում ՀՀ դեսպանությունը ՝ հավաստիացնելով, որ ամբողջ օրվա ընթացքում դեսպանատան աշխատակիցները կապ են պահպանել ՀՀ քաղաքացիների հետ, ովքեր ապրիլի 2-ին նախատեսված չվերթի չեղարկման պատճառով չեն կարողացել Մոսկվայի "Դոմոդեդովո" օդանավակայանից մեկնել Երևան:

 

<Քաղաքացիների հետ շփվել է ՌԴ-ում ՀՀ դեսպան Վարդան Տողանյանը, դեսպանորդ Բորիս Սահակյանը։ Նշենք, որ ներկայում քաղաքացիների մեծ մասը հեռացել է օդանավակայանի տարածքից, նրանք հարազատների տանն են գտնվում>,- նշվում է հաղորդագրության մեջ։ Ավելացվում է, որ նրանք, ովքեր չեն լքել օդանավակայանի տարածքը, ապահովվել են անհրաժեշտ սնունդով։

 

Մինչդեռ, ինչպես իր էջում հայտնել է բլոգեր Ռոման Բաղդասարյանը, ապրիլի 2 - ին Մոսկվայի "Դոմոդեդովո" օդանավակայանում (S7 չվերթը անսպասելիորեն չեղյալ է հայտարարել) մնացել են Հայաստանի 40 քաղաքացիներ եւ միակ մարդը, ով իրապես եկել եւ օգնել է մարդկանց (կերակրել եւ ուղարկել հյուրանոց) Շահեն Պետրոսյան է։

 

Նախօրեին համացանցում տարածվել է տեսանյութ, որտեղ չեղարկված չվերթի ուղևորներից մեկը օգնության խնդրանքով դիմում է ՀՀ կառավարությանը: Տեսանյութում տղամարդը դիմում է ՀՀ կառավարությանը. «Տոմսերն առած են, կեսինը հետ են տվել, կեսինը՝ չէ։ Ժողովրդի մոտ ոչ փող կա, ոչ էլ ուտելու բան, մարդ կա` երեկվանից նստած է այդպես։ Ինչպե՞ս անենք, որ մեր կառավարությունը օգնի։ Դեսպանատունը ոչ մի բանից տեղյակ չէ, Երեւան էլ ում զանգում ենք, որ անձնակազմի ղեկավարներին զանգում ենք, ոչ մեկին բանի տեղ չեն դնում։ Վարչապետին տեղյակ պահեք, որ այդքան ասում են՝ հայերը գան Հայաստան, ո՞ւր է իրենց տված խոստումները, ժողովուրդն այստեղ ինչքա՞ն պետք է սոված, ծարավ, առանց հաց, առանց ջուր նստի։ Վաղը մյուս օրեն էլ «Դոմոդեդովո»–ից կհանեն դուրս, ժողովուրդն այս ցրրտին պետք է դրսում նստի։