Արմինֆո. Դեկտեմբերի 10-ից 12-ը ՀՀ ԱԳ նախարարի տեղակալ Արտակ Ապիտոնյանն աշխատանքային այցով գտնվում էր Ժնևում՝ մասնակցելու Կարմիր խաչի և Կարմիր մահիկի 33-րդ միջազգային համաժողովին, որի լիագումար նիստի ժամանակ հանդես է եկել ելույթով։
Ինչպես ԱրմԻնֆո-ին հաղորդեցին ԱԳՆ մամուլի ծառայությունից, իր ելույթում Արտակ Ապիտոնյանը ներկայացրել է Հայաստանի մոտեցումները մարդասիրական աղետալի իրավիճակներին դիմագրավելու ուղղությամբ միջազգային հանրության համակարգված գործողությունների իրականացման անհրաժեշտության վերաբերյալ՝ կարևորելով ինչպես մարդու իրավունքների լիակատար իրականացումն անկախ երկրից և տարածքի կարգավիճակից, այնպես էլ ցեղասպանությունների և զանգվածային ոճրագործությունների վաղ կանխարգելումը։ Անդրադառնալով Կարմիր խաչի միջազգային կոմիտեի հետ Հայաստանում իրականացվող ծրագրերին՝ Արտակ Ապիտոնյանը, մասնավորապես, կարևորել է սահմանամերձ շրջաններում բնակիչների անվտանգության և դպրոցների ապահովության բարձրացման, գյուղատնտեսական աշխատանքների շրջանում հրադադարի վերահսկման աշխատանքների շարունակականությունը։
ՀՀ ԱԳ նախարարի տեղակալն անդրադարձել է Հայաստանի Կարմիր խաչի ընկերության գործունեությանը, որը գալիք տարի կնշի իր հարյուրամյա հոբելյանը։ Նա նաև բարձր է գնահատել Կարմիր Խաչի կամավորների ու միսիոներների ջանքերը, որոնք Ցեղասպանության տարիներին փրկել են հազարավոր կյանքեր, հիմնել են որբանոցներ, դպրոցներ ու օգնել կարիքավորներին, կոչ անելով միջազգային հանրությանը ջանք չխնայել օժանդակելու ներկայումս մարդասիրական գործունեությամբ զբաղվող անհատների՝ հատկապես կանանց գործունեությանը։
Դեկտեմբերի 11-ին Արտակ Ապիտոնյանը հանդիպել է ՄԱԿ փախստականների հարցերով գերագույն հանձնակատարի պաշտպանության հարցերով օգնական Ջիլլիան Թրիգսի հետ։ Կողմերը քննարկել են դեկտեմբերի 17-ից 18-ը Ժնևում կայանալիք Փախստականների հարցերով առաջին գլոբալ ֆորումին վերաբերող հարցեր, մտքեր են փոխանակել փախստականներին և տեղահանվածներին առնչվող օրակարգի շուրջ միջազգային համագործակցության վերաբերյալ։ ԱԳ նախարարի տեղակալը ներկայացրել է արդյունավետ ինտեգրման ուղղությամբ Հայաստանի դրական փորձը և գրանցած ձեռքբերումները։
Նույն օրը Արտակ Ապիտոնյանը Ժնևում հանդիպել է նաև ՄԱԿ Ժնևյան գրասենյակի գլխավոր տնօրենի աշխատակազմի ղեկավար Դավիթ Չիկվաիձեի հետ։ Հանդիպման ժամանակ կողմերն անդրադարձել են Հայաստանի և ՄԱԿ Ժնևյան գրասենյակի միջև արդյունավետ փոխգործակցությանը։
Այնուհետև ՄԱԿ-ի ժնևյան գրասենյակում Հայաստանի մշտական ներկայացուցչությունը, ի պատիվ ՀՀ ԱԳ նախարարի տեղակալի այցի, կազմակերպել է ընդունելություն, որին հրավիրված էին ՄԱԿ-ի և Ժնևում գործող այլ միջազգային կազմակերպությունների հայազգի աշխատակիցները։ Ընդունելությանը ներկա էր նաև աշխատանքային այցով Ժնևում գտնվող ՀՀ շրջակա միջավայրի նախարարի տեղակալ Իրինա Ղափլանյանը։