Արմինֆո Կառավարությունը պետք է զբաղվի քաղաքացիների աշխատանքի տեղավորման նպատակային քաղաքականության մշակմամբ։ Զուգահեռաբար պետք է ուժեղացնել պետական ապարատի դերը։ Միայն այդ կերպ կարելի է կանխել այն իրավիճակները, ինչպիսին եղավ օրերս Իջևանում։ ԱրմԻնֆո-ին այդպիսի կարծիք է հայտնել Հայաստանի դեմոկրատական կուսակցության նախագահ Արամ Սարգսյանը։
"Իջևանի դեպքերը, բողոքի այդ բոլոր ակցիաները, ապօրինի անտառահատմամբ հետաքրքրված մի խումբ անձանց շահերի բախումը պետության և հասարակության շահերի հետ ոչ այլ ինչ են, եթե ոչ նախկին կառավարման համակարգի մնացուկ։ Այս լույսի ներքո՝ ես խորապես համոզված եմ մեր երկրում օլիգարխիկ համակարգի վերջնական, ամբողջական ապամոնտաժման վերաբերյալ համապատասխան հայեցակարգի պատրաստման անհրաժեշտության մեջ", - նշել է նա։
Հուլիսի 4-ին ՀՀ Ազգային ժողովն ընդունեց Վարչական և քրեական օրենսգրքերի փոփոխությունների նախագիծը, որը անտառահատումների համար նախատեսում է ոչ թե վարչական, այլ քրեական պատասխանատվություն: Օրենքի առաջին խախտումը պատժվելու է տուգանքով, իսկ երկրորդը՝ արդեն քրեական պատասխանատվությամբ ։ Օրինագծի ընդունումն ուղեկցվել է իրավապահ եւ ոլորտի այլ պատասխանատու մարմինների կողմից հատվող անտառների ուժեղացված հսկողությամբ:
Նորամուծությունները դժգոհություն և հակազդեցություն են առաջացրել Տավուշի մարզում անտառահատումներով հետաքրքրված քաղաքացիների շրջանում։ Հուլիսի 17-ին Իջևանի անտառտնտեսության աշխատակիցները փակել էին ՀՀ-ն Վրաստանի հետ կապող ավտոճանապարհը ՝ պահանջելով չխոչընդոտել անտառահատումները: Ոստիկանության կողմից կուտակված տրանսպորտի համար ճանապարհը մաքրելու փորձերին ի պատասխան՝ քարեր են նետվել, որից հետո վնասվածքներ ստացած 13 ոստիկաններ տեղափոխվել են հիվանդանոց: Հարուցված քրեական գործի շրջանակներում ձերբակալվել են բախումների 13 կազմակերպիչներ և մասնակիցներ:
Սարգսյանի գնահատմամբ՝ քաղաքացիների աշխատանքի տեղավորման խնդիրը հեռու է Տավուշի մարզից եւ համալիր բնույթ է կրում։ Այս լույսի ներքո՝ նա Իջևանում տեղի ունեցած բախումները դիտարկում է որպես հերթական առիթ հանրապետության կառավարության համար լրջորեն խորհելու իրավիճակի և դրա հետ կապված խնդիրների շուրջ։
"Այս խնդիրը չի կարելի միակողմանի դիտարկել։ Բառացիորեն նախօրեին Տավուշի մարզպետ Հայկ Չոբանյանը դժգոհում էր, որ իջեւանցիները հրաժարվում են աշխատել եւ լրացնել, ըստ նրա, առկա 200 թափուր աշխատատեղերը։ Որքան ես հասկանում եմ, այստեղ խոսքը ճանապարհաշինության ոլորտում աշխատատեղերի մասին է։ Բայց ոչ բոլորն են տիրապետում շինարարական հմտություններին։ Ըստ այդմ, մարդիկ ստիպված կլինեն փող աշխատելու այլ միջոցներ փնտրել կամ, ինչպես Հայաստանում է, պարզապես լքել երկիրը ՝ ավելի լավ կյանք փնտրելով", - ամփոփել է քաղաքական գործիչը։