Հինգշաբթի, 25 Ապրիլի 2019 12:34

Արմինֆո. ՙԹավշյա հեղափոխությունում՚ ոչ մի աշխարհաքաղաքական կոնտեքստ չի եղել, ոչ մի աշխարհաքաղաքական դավադրություն չի եղել։ ՙՄեզ բոլորիս համար դա միայն քաղաքական հարց չէ։  Դա նաեւ իմ անձնական արժանապատվության հարց է՚:

Այս մասին ռուսական "Նեզավիսիմայա գազետա" թերթին տված հարցազրույցում ասել է ՀՀ վարչապետ Նիկոլ Փաշինյանը՝ փարատելով աշխարհաքաղաքական տրամադրությունների և դավադրությունների մասին շրջանառվող կասկածները 2018 թվականին Հայաստանում տեղի ունեցած ներքաղաքական գործընթացների ֆոնին։

 

Լրագրողի հետ զրույցում Փաշինյանը պարզաբանել է, որ մինչեւ վարչապետ ընտրվելը հայտարարել է, որ Հայաստանի արտաքին քաղաքականության մեջ որեւէ հիմնարար փոփոխություն չի լինի, եւ ամբողջությամբ կպահպանվի արտաքին քաղաքական ուղեգիծը: ՙԲայց պետք է հասկանալ, թե որտեղից է առաջացել նման անվստահությունը՚, - ընդգծել է վարչապետը:

 

ՙՄի շարք հայտնի հեղափոխություններից հետո, որոնք ընդունված է անվանել գունավոր, այդ երկրներում հայտնվել են հակառուսական տրամադրություններ։  Մեզ համար շատ կարևոր է արձանագրել, և ես այդ մասին բազմիցս ասել եմ, որ մեր հեղափոխության մեջ որևէ աշխարհաքաղաքական կոնտեքստ չի եղել, չի եղել որևէ արտաքին ուժ, որը ներգրավված լիներ հեղափոխական գործընթացի մեջ։  Դա շատ կարեւոր է։  Բայց ռուսական որոշ շրջանակներում իմ այդ հայտարարություններին կասկածով են վերաբերվում՚, - ընդգծել է Հայաստանի վարչապետը, նշելով, որ Հայաստանը շարունակում է մնալ ՌԴ ռազմավարական դաշնակիցը՝ Հանրապետությունը համարելով Ռուսաստանի համար կարեւոր երկիր։

 

Փաշինյանի կարծիքով՝ ռուսաստանցի փորձագետներն ու քաղաքական գործիչները պետք է կանխագուշակեին Հայաստանում հնարավոր հեղափոխության եւ իշխանափոխության իրադարձությունները։ ՙԲայց իրադարձությունների վերլուծություն, ամենայն հավանականությամբ, չի արվել, մինչև վերջին օրը նրանք պնդում էին, որ Հայաստանում ոչինչ չի փոխվի, որ Սերժ Սարգսյանն առանց խնդիրների կդառնա վարչապետ և կշարունակի կառավարել... Իսկ հիմա նրանց բացատրություններ են պետք, դրա համար ՙտեղեկություններ՚ են հայտնվում այն մասին, որ հեղափոխության հետևում, իբր, դրսից ինչ-որ ուժեր են եղել՚, - ասել է Փաշինյանը, կրկին ընդգծելով, որ Հայաստանում տեղի է ունեցել ոչ բռնի ժողովրդական թավշյա հեղափոխություն՝ այն համարելով եզակի երևույթ համաշխարհային պատմության մեջ և հայ ժողովրդի հպարտության առարկա։

 

Անդրադառնալով ռուս-հայկական հարաբերությունների թեմային՝ Փաշինյանը համոզմունք է հայտնել, որ ոչինչ չի փոխվել, իսկ եթե փոխվել է, ապա՝ միայն դեպի լավը։ ՙԻնչպես եւ խոստացել էի, մեր հարաբերություններում մութ անկյուններ չկան, մեր դիրքորոշումը եւ աշխատանքային զրույցներում, աշխատանքային շփումներում չի տարբերվում հրապարակային շփումից, եւ դա շատ լավ հնարավորություն է նոր մակարդակի բարձրացնելու մեր հարաբերությունները: Իհարկե, Ռուսաստանը մեր ռազմավարական գործընկերն ու դաշնակիցն է։ 

Բայց  պետք է նաև հաշվի առնել, որ մենք ունենք ներքաղաքական օրակարգ, որը, բնականաբար, չի համընկնում ոչ Ռուսաստանի, ոչ Բելառուսի, ոչ Ղազախստանի, ոչ Ֆրանսիայի, ոչ ԱՄՆ-ի ներքաղաքական օրակարգի հետ։  Որովհետև յուրաքանչյուր երկիր ունի իր ներքաղաքական օրակարգը և դա որևէ կերպ չի ազդում այլ երկրների հետ մեր հարաբերությունների ընդհանուր ֆոնի վրա։  Իհարկե, կան նրբություններ, օրինակ,  Եվրոպական միության հետ մեր հարաբերություններն ավելի ակտիվ են դարձել։  Բայց մեր ռուս գործընկերները տեղեկացված են այդ մասին։   Մենք, ինչպես խոստացել էինք, թափանցիկ ենք մնում մեր հարաբերություններում ռուս գործընկերների համար։   Եվ իմ պատասխանը ՝ այո, Ռուսաստանը մեզ համար ռազմավարական դաշնակից է՚, - ամփոփել է Հայաստանի վարչապետը։