Արմինֆո.Արցախի Հանրապետության նախագահի այժմ արդեն նախկին խորհրդական - Արցախի Հանրապետության նախագահի հատուկ հանձնարարությունների գծով ներկայացուցիչ Արայիկ Հարությունյանը բացատրել է իր հրաժարականի պատճառները
«Հարգելի՛ հայրենակիցներ, իմ դիմումի համաձայն՝ ես այսօրվանից թողնում եմ Հանրապետության նախագահի խորհրդականի ու հատուկ հանձնարարությունների գծով ներկայացուցչի պաշտոնը եւ սկսում եմ կուսակցական շինարարության ավելի բուռն աշխատանք ծավալել:
Ամեն տեսակ շահարկումներից խուսափելու համար ուզում եմ ընդգծել, որ իմ որոշումը պայմանավորված չէ Հանրապետության նախագահի հետ որեւէ տարաձայնությամբ կամ խնդրով: Ավելին, ես իմ երախտագիտությունն եմ հայտնում Նախագահ Սահակյանին, ով 2007թ.-ից հնարավորություն ընձեռեց ավելի քան 11 տարի ծառայելու մեր երկրին ու ժողովրդին:
Թե՛ վարչապետի, թե՛ պետական նախարարի եւ թե՛ նախագահի խորհրդականի ու հատուկ հանձնարարությունների գծով ներկայացուցչի պաշտոններում իմ առաքելությունն է եղել աշխատել եւ օգտակար լինել մեր հայրենիքի առաջընթացին: Ուրախ եմ, որ այսօր ձեւավորված է արհեստավարժ թիմ, որն ի զորու է ապահովել Կառավարության ծրագրով նախատեսված բարձր ցուցանիշները:
Այս առթիվ ցանկանում եմ հայտարարել, որ իմ գլխավորած քաղաքական ուժը մինչեւ Նախագահ Սահակյանի կառավարման ժամկետի ավարտը շարունակելու է պաշտպանել նրա վարած քաղաքական կուրսը՝ հանուն Արցախի Հանրապետության կայուն ու խաղաղ զարգացման>,-Ֆեյսբուքի իր էջում գրել է նա:
Նշենք, որ Հարությունյանը համարվում է 2020 թ. Արցախի նախագահի պաշտոնի հիմնական հավակնորդը: ԱրմԻնֆո-ի տեղեկության համաձայն, նրա հրաժարականը պայմանավորված է նախընտրական արշավին ավելի ակտիվ նախապատրաստման ձգտումով: