Պրն.դեսպան, Հայաստանը և Բելառուսը նշում են երկու երկրների միջև դիվանագիտական հարաբերությունների հաստատման 20-ամյակը: Ի՞նչ արդյունքների  են հասել մեր երկրները համագործակցության այս 20 տարիներին, հանդես գալով անկախ պետությունների կարգավիճակով:

 ՙՀայՌուսգազարդի՚ ստորաբաժանումներից մեկի տարածքում ՙՖ-1՚ տիպի նռնակ է հայտնաբերվել:

Ինչպես ԱրմԻնֆո գործակալությանը հաղորդել են Հայաստանի ոստիկանության մամուլի ծառայությունից, կասկածելի առարկայի մասին հաղորդում է ստացվել հունիսի 16-ին, ժամը 12.50-ին` ՙՀրազդան-5՚ մասնաճյուղի տնօրինությունից: Ստացված տեղեկատվության համաձայն, ընկերության խոտածածկ տարածքում, պարսպի տակ, չօգտագործվող երկաթգծի ռելսերի կտորի վրա նռնակ է հայտնաբերվել:

Դեպքի վայր մեկնած փրկարարները պարզել են, որ նույն օրը, ժամը 08.30-ին մոտ հիմնարկության պահակը  հայտնաբերել է կոռոզիայի ենթարկված ՙՖ-1՚ տիպի նռնակ` առանց պայթուցիչի: Հայտնաբերվածն ուղարկվել է փորձաքննության: Կատարվում է հետաքննություն:

 Երևանի առևտրային բանկերից ԱրմԻնֆո գործակալությանը տրամադրված տվյալների համաձայն, տարադրամի փոխանակման բանկային կետերում  այսօր ԱՄՆ 1 դոլարի առքի առավելագույն գինը կազմել է 413 դրամ 1 դոլարի դիմաց, եվրոյի առքի առավելագույն գինը` 549 դրամ 1 եվրոյի դիմաց, իսկ ռուսական ռուբլու առքի գինը`13 դրամ 1 ռուբլու դիմաց: ԱՄՆ դոլարի վաճառքի նվազագույն գինը կազմել է 414 դրամ 1 դոլարի դիմաց, եվրոյի վաճառքի գինը կազմել է 553 դրամ 1 եվրոյի դիմաց, իսկ ռուսական ռուբլու վաճառքի գինը`13 դրամ 1 ռուբլու դիմաց: -0-    

 ԵԱՀԿ գործող նախագահ, Ուկրաինայի արտգործնախարար Լեոնիդ Կոժարայի այցը Հայաստան և Ադրբեջան անորոշ ժամանակով հետաձգվում է: Այդ մասին ԱրմԻնֆո գործակալությանը հաղորդել են ԵԱՀԿ Երևանի գրասենյակում:

ՙԿոժարայի Ադրբեջան և Հայաստան նախատեսված այցը կհետաձգվի: Այցի նոր ամսաթվի վերաբերյալ լրացուցիչ տեղեկատվություն կտրամադրվի ավելի ուշ՚, - հաղորդել են գրասենյակում:

Ավելացնենք, որ ԵԱՀԿ գործող նախագահը կայցելի միայն Վրաստան` հունիսի 18-19-ը:

 Երևանի ավագանու ՙԲարև Երևան՚ խմբակցության ղեկավար Անահիտ Բախշյանը նամակ է ուղարկել քաղաքապետ Տարոն Մարգարյանին, որում մասնավորապես ասված է. ՙՀարգելի պարոն Մարգարյան, հայտնում ենք Ձեզ, որ ՙԵրևան քաղաքում տեղական ինքնակառավարման մասին՚ ՀՀ օրենքի 32-րդ հոդվածի 3-րդ կետով նախատեսված՝ ՙԲարև Երևան՚ խմբակցությանը տրամադրվող տեխնիկապես մաշված, չգործող ՙԳԱԶ 3110՚ մակնիշի ավտոմեքենայից խմբակցությունը հրաժարվում է, հաշվի առնելով նաև այն հանգամանքը, որ ավագանու խմբակցություններին տրամադրվող ավտոմեքենաների առումով ցուցաբերվում է խտրական մոտեցում՚:

 Հայաստանում ինտերնետից օգտվողների թիվը և  սպառման ծավալները վերջին հինգ տարում 50-60 անգամ ավելացել են: Այդ մասին հաղորդել է   GNC-Alfa-ի (հանդես է գալիս ՙՌոստելեկոմ՚ բրենդով) գլխավոր տնօրեն Հայկ Ֆարամազյանը լրագրողների հետ հանդիպմանը:

Նրա հավաստմամբ, լայնաշերտ ինտերնետի օգտատերերի թիվը հինգ տարում ավելացել է մինչև 350-400 հազար, իսկ սպառման ծավալները` մինչև 60-70 գեգաբիթ: Նա նշել է, որ աճն ապահովվել է, հիմնականում, մարզերի հաշվին, և այժմ մարզերի և մայրաքաղաքի սպառողների հարաբերակցությունը մոտ 50/50 տոկոս է: Հանրապետությունում գործում են խոշորագույն միջազգային օպերատորների ներկայացուցիչներ, և մրցակցությունը հանգեցրել է օգտատերերի թվի աճի և ինտերնետի գների զգալի նվազման: ՙԱյսօր գին-որակ հարաբերակցությամբ Հայաստանն առաջատարն է տարածաշրջանում՚, - ասել է ֆարամազյանը: Նա ավելացրել է, որ ըստ կորպորատիվ հաճախորդների հատվածում ինտերնետի որակի Հայաստանն ակնհայտորեն առաջ է անցել տարածաշրջանի երկրներից (Վրաստան, Ադրբեջան, Իրան և Թուրքիա), իսկ զանգվածային ինտերնետի գծով, համենայն դեպս, չի զիջում: Նման բարձր նվաճումները հնարավոր են դարձել օպերատորների ագրեսիվ ներդրումների շնորհիվ, որոնք մինչ օրս շարունակվում են: Ներդրումները նպաստում են ոչ միայն շուկայի զարգացմանը, այլև դրա ձևավորմանը, նշել է Ֆարամազյանը: Միայն ներդրումների շնորհիվ ՙՌոստելեկոմը՚, որ Հայաստանում ծառայություններ է սկսել տրամադրել անցյալ տարվա վերջից, արդեն ստեղծել է ավելի քան 1000 աշխատատեղ, նշել է Ֆարամազյանը: Ընկերությունը օպտիկամանրաթելային մալուխ է անցկացրել մինչև ԼՂՀ սահման, և հետո տեղի օպերատոր ՙՂարաբաղ Տելեկոմը՚ ԼՂՀ-ում իր ցանցն է կառուցել: Վերջին 2,5 տարում ԼՂՀ-ում ինտերնետի օգտատերերի թիվն ավելացել է 40-50 տոկոսով, իսկ գներն զգալիորեն նվազել են, նշել է գլխավոր տնօրենը:

 ԵԱՀԿ գործող նախագահ, Ուկրաինայի արտգործնախարար Լեոնիդ Կոժարայի հունիսի 17-19-ը Հայաստան և Ադրբեջան նախատեսված այցի ժամկետները հետաձգվում են, հաղորդում է APA-ն` վկայակոչելով սեփական դիվանագիտական աղբյուրները: Ընդ որում աղբյուրը չի նշում Կոժարայի Հայաստան և Ադրբեջան այցի նոր ժամկետներ: Սակայն ԵԱՀԿ գործող նախագահը կայցելի Վրաստան: Հայաստան եւ Ադրբեջան նրա այցի հետաձգման պատճառը երկու երկրների  նախագահների աշխատանքային գրաֆիկներն են:

 ՙՈսկե ծիրան՚ 10-րդ միջազգային կինոփառատոնում կներկայացվի 200 ֆիլմ, որոնցից 90-ը ներառված է մրցութային ծրագրում, հաղորդել է փառատոնի ծրագրերի տնօրեն Միքայել Ստամբոլցյանը հունիսի 14-ի մամուլի ասուլիսում:

Ասուլիսի բանախոսներն էին Միքայել Ստամբոլցյանը (ՙՈսկե ծիրան՚ Երևանի ՄԿՓ ծրագրերի տնօրեն), Արա Խանջյանը (ՙՈսկե ծիրան՚ Երևանի ՄԿՓ փոխտնօրեն), Արամ Շահբազյանը (կինոռեժիսոր, ՙԿորիզ՚ կարճամետրաժ ֆիլմերի ծրագրի ղեկավար) և Րաֆֆի Մովսիսյանը (կինոքննադատ, Հայկական համայնապատկեր մրցութային ծրագրի ղեկավար):

Այս տարի ֆիլմերի ծրագիրն ավանդաբար կպահպանի չորս մրցույթները: Մրցույթում ընդգրկված ֆիլմերը կներկայացվեն համապատասխանաբար Խաղարկային, Վավերագրական, Հայկական համայնապատկեր և ՙԿորիզ՚ (կարճամետրաժ ֆիլմերի) անվանակարգերում:

Խոսելով փառատոնի հանդեպ տարեցտարի աճող հետաքրքրության և ներկայացված հայտերի մեծ թվի մասին (ավելի քան 1200 հայտ` շուրջ 96 երկրից)` Միքայել Ստամբոլցյանը նշեց, որ մրցութային ծրագրում ընդգրկվել են միայն մոտ 90-ը: Արամ Շահբազյանը, ներկայացնելով «Կորիզե կարճամետրաժ ֆիլմերի մրցույթը, նշեց, որ այս ծրագիրը ներառում է հիմնականում երիտասարդ ռեժիսորների ֆիլմեր և հրաշալի հնարավորություն է հայ երիտասարդների համար ծանոթանալու աշխարհում իրենց հասակակիցների գործերին: Արա Խանջյանն էլ իր հերթին նշեց, որ վավերագրական մրցույթի ֆիլմերի ընտրության գործում մեծ է եղել երիտասարդ կինոքննադատների մասնակցությունը: Հայկական համայնապատկեր մրցույթի ծրագիրը ներկայացրեց կինոքննադատ Րաֆֆի Մովսիսյանը: Բանախոսները ներկայացրին նաև այս տարվա ժյուրիի անդամներին:

Խաղարկային մրցույթում ներկայացված են ՙ11 հանդիպում հորս հետ՚ (ռեժ. ` Նիկոս Կորնիլիոս, Հունաստան, 2012թ.), ՙԵրկար, երջանիկ կյանք՚ (ռեժ.` Բորիս Խլեբնիկով, Ռուսաստան, 2013թ.), ՙՍոսկ կյանք՚ (ռեժ.` Սանհուն Փարկ, Կորեայի հանրապետություն, 2012թ.), ՙՇրջաններ՚ (ռեժ.`Սրդան Գոլուբովիչ, Սերբիա, 2013թ.), ՙԻմ մարդասպան շունը՚ (ռեժ.` Միրա Ֆորնայ, Սլովակիա/Չեխիայի հանրապետություն, 2013թ.), ՙՓարվիզ՚ (ռեժ.`Մաջիդ Բարզեգար, Իրան, 2012թ.), ՙՀինգերորդ եղանակ՚, (ռեժ.` Պիտեր Բրոսենս/Ջեսիկա Վուդուորթ, Բելգիա/Ֆրանսիա/Նիդերլանդներ, 2012թ.), ՙԼուսանկարը՚ (ռեժ.` Մաչեյ Ադամեկ, Լեհաստան/Գերմանիա/Հունգարիա, 2012թ.), ՙՁայն լռության՚ (The Voice of Silence), ռեժ.` Վիգեն Չալդրանյան, (Հայաստան, 2013թ.), ՙRendez-Vous Կիրունայում՚, (Rendez-Vous In Kiruna), ռեժ.`Աննա Նովիոն, (Ֆրանսիա, 2013թ.)
ՙՀերոին՚, (Heroin), ռեժ.` Ռենե Հոուեն, (Հոլանդիա, 2013թ.):

Վավերագրական մրցույթում կներկայացվեն հետևյալ ֆիլմերը.
ՙԱշխարհ, որ մերը չէ՚, (ռեժ.`Մահդի Ֆլեյֆել, Մեծ Բրիտանիա, 2012թ.)
ՙԵրկու հոգու միջև՚,  ռեժ.`Լորանս Պերիգո, Շվեյցարիա, 2012թ.)
ՙԱրյունակից եղբայր՚ (Blood Brother), ռեժ.` Սթիվ Հուվեր, (ԱՄՆ, 2012թ.)
ՙՉար… անտերունչ կղզին՚ (Char - The No-Man's Island), ռեժ.` Սուրավ Սարանգի, (Հնդկաստան, 2012թ.)
ՙՁուկիայի եզը՚ (Dzukija's Bull) ռեժ.` Լինաս Միկուտա, (Լիտվա, 2013թ.)
Leviathan, ռեժ.` Վերենա Պարավել, Լուսիեն Կաստենգ-Թեյլոր, (Մեծ Բրիտանիա/Ֆրանսիա/ԱՄՆ, 2012թ.)
ՙՔայլի'ր, քայլի'ր, ձախով՚, (March, March With Your Left!), ռեժ.` Եվգենյա Մոնտանյա Իբանյես, (Ռուսաստան, 2012թ.)
ՙԻմ Աֆղանստան. կյանքն արգելված գոտում՚ (My Afghanistan - Life in the Forbidden Zone), ռեժ.` Նագիբ Խայա, (Դանիա, 2012թ.)
ՙՍև ծովի վերջին ծովահենները՚ (The Last Black Sea Pirates), ռեժ.` Սվետոսլավ Ստոյանով, (Բուլղարիա, 2013թ.)
ՙԱմեն  ինչ անհետացնող մեքենան՚ (The Machine Which Makes everything Disappear), ռեժ.` Թինաթին Գուրչիանի, (Վրաստան/Գերմանիա, 2012թ.)
ՙՍպասարան՚ (The Waiting Point) ռեժ.`Մաշա Դրնդիչ, (Խորվաթիա, 2013թ.)


Հայկական համայնապատկեր ծրագրում կներկայացվեն 23 խաղարկային, վավերագրական և կարճամետրաժ ֆիլմեր: Մասնավորապես.

ՙԲոլորս միասին հիմա՚, ռեժ.`Ալեքսանդր Տավիցիան-Միրեցկի, (ԱՄՆ, 2012թ.)
ՙԲոլորը մեկնել են՚, ռեժ.` Գիորգի Փարաջանով, (Վրաստան)
ՙԱյդ ես չեմ՚,  ռեժ.`Մարիա Սահակյան, (Հայաստան, 2013թ.)
ՙԱյնտեղի մարդիկ՚, ռեժ.` Հայկ Կարապետյան, (Լատվիա, 2012թ.)
ՙԹափառում՚, ռեժ.` Արշալույս Հարությունյան, (Հայաստան, 2011թ.)

ՙՋրից հետո ավազ է մնում՚ (After Water There Is Sand) ռեժ.` Սարո Վարժապետյան, (Հայաստան, 2011թ.)
ՙԱլխաս և Ջուլիետ՚ (Alkchas and Juliet), ռեժ.` Աշոտ Քեշիշյան, (Ռուսաստան, 2013թ.)
ՙԸնդհատված մանկություն՚ (Broken Childhood), ռեժ.` Ջիվան Ավետիսյան (Հայաստան, 2013թ.)
ՙԿորած հորիզոններ՚ (Lost Horizons) ռեժ.` Առնո Խայաջանյան (Ֆրանսիա, 2012թ.)
ՙՆերեյշա՚ (Nereysha) ռեժ.` Սերգո Ուստյան ( Հայաստան)
ՙՍպիտակ գառան երազը՚ (White Lamb’s Dream), ռեժ.` Հրանտ Վարդանյան (Հայաստան, 2013թ.)
ՙԽավարում՚ (Eclipse), ռեժ.` Արշալույս Հարությունյան (Հայաստան, 2013թ.)
ՙԻդան այստեղ է՚ (Ida is Here), ռեժ.` Էմիլ Մկրտչյան (Շվեդիա, 2013թ.)
Մարաթոն (Marathon), ռեժ.` Հարութ Շատյան, (Հայաստան, 2013թ.)
ՙՀայկական արձագանքներ. Մաս երեք՚ (Armenian Echoes Part Three) ռեժ.` Հակոբ Գուդսուզյան, (Կանադա, 2012թ.)
ՙԷմբերս՚ (Embers), ռեժ.` Թամարա Ստեփանյան (Հայաստան/Լիբանան/Քաթար, 2012թ)
ՙԲավական՚ (Enough), ռեժ.`Ադրինե Գրիգորյան (Հայաստան)
ՙՍտեղծագործելու բանաձև՚ (Create a Formula), ռեժ.` Նիկոլայ Դավթյան (Հայաստան, 2011թ.)
ՙՀայրը՚ (Father) ռեժ.` Մարատ Սարգսյան, (Լիտվա, 2012թ.)
ՙՀողի կանչը՚ (Figure of Armen), ռեժ.` Մառլեն Էդոյան, (Կանադա, 2012թ.)
ՙՊեպիտո՚ (Pepitto), ռեժ.` Գուրգեն Ջանիբեկյան (Հայաստան, 2013թ.)
ՙՍարոյանլենդ՚ (SaroyanLand), ռեժ.` Լուսին Դինք (Թուրքիա/Հայաստան/Ֆրանսիա, 2013թ.)
ՙՎ…, այսինքն` Վեռնյոյ՚ (V… For Verneuil), ռեժ.` Արտո Փեհլիվանյան (Ֆրանսիա, 2013թ.)

 Լեռնային Ղարաբաղի հակամարտությունը ուժային լուծում չունի, և պատերազմը ողբերգական հետևանքներ կունենա ամբողջ տարածաշրջանի համար: Այդ մասին հայտարարել է ԼՂՀ արտգործնախարար Կարեն Միրզոյանը ֆրանսիական France-24 հեռուստաընկերությանը հարցազրույցում:

ԼՂՀ ԱԳՆ ղեկավարը պատասխանել է ղարաբաղյան հակամարտության նախապատմությանը, կարգավորման ներկա փուլին և հեռանկարներին, մարդասիրական խնդիրներին, Արցախում տնտեսական իրավիճակին վերաբերող մի շարք հարցերի:
Ներկայացնելով Ադրբեջանի և Լեռնային Ղարաբաղի միջև հակամարտության առաջացման պատմությունը՝ Կարեն Միրզոյանը նշել է, որ 1988թ. ղարաբաղյան շարժումը ոչ միայն Հայաստանին միանալու, այլև մարդու իրավունքների, սոցիալական և տնտեսական իրավահավասարության համար մղվող պայքար էր: Սակայն, ինչպես նկատել է ԱԳ նախարարը, երիտասարդության, ուսանողների և աշխատավորների խաղաղ ցույցերին ի պատասխան Սումգայիթում, Բաքվում, Կիրովաբադում և Ադրբեջանի մնացած հայաբնակ քաղաքներում հայերի ջարդեր սկսվեցին, որոնց հետևեց անմիջապես Լեռնային Ղարաբաղի դեմ ուղղված ագրեսիան:

ՙԱդրբեջանն առաջին հերթին պետք է փոխի իր դիրքորոշումը. դա մի երկիր է, որն անընդհատ խորացնում է ամեն հայկականի նկատմամբ ուղղված այլատյացությունն ու ատելությունը՚,- ասել է Կարեն Միրզոյանը:

ԼՂՀ արտաքին քաղաքական գերատեսչության ղեկավարն անդրադարձել է նաև Արցախի տնտեսական իրավիճակին, գերակա ոլորտներում արձանագրված ձեռքբերումներին և զարգացման հեռանկարներին: Անդրադառնալով մարդասիրական հարցերին՝ ԱԳ նախարարն ուշադրություն է հրավիրել Արցախում ապրող հայ փախստականների խնդրին, ովքեր, ի տարբերություն ադրբեջանցի փախստականների, զրկված են միջազգային աջակցությունից: Կարեն Միրզոյանը համոզմունք է հայտնել, որ վաղ թե ուշ գտնվելու է հիմնախնդրի լուծումը, որը կապահովի երկու անկախ պետությունների՝ Լեռնային Ղարաբաղի և Ադրբեջանի անվտանգ զարգացումն ու բարգավաճումը: Միևնույն ժամանակ ԱԳՆ ղեկավարը նշել է, որ Ադրբեջանի հետ հակամարտության վերջնական կարգավորումը հնարավոր է միայն բանակցություններին ԼՂՀ լիարժեք մասնակցության դեպքում:

 Ազգային ժողովի փոխնախագահ Էդուարդ Շարմազանովը հունիսի 14-ին ընդունել է Էստոնիայի Հանրապետության խորհրդարանի պատգամավորներ Իգոր Գրյազինին, Սիմ Կաբրիթսին, Մարետ Մարիպուին:

Ինչպես ԱրմԻնֆո գործակալությանը հաղորդեցին ԱԺ հասարակայնության եւ տեղեկատվության միջոցների հետ կապերի վարչությունից, հանդիպման ժամանակ քննարկվել են հայ-էստոնական միջխորհրդարանական, տնտեսական ու մշակութային կապերի զարգացմանն առնչվող հարցեր: Երկուստեք արձանագրել են, որ հատկապես տնտեսական համագործակցության ներկա վիճակը բավարար չի կարելի համարել այն դեպքում, երբ առկա են համատեղ  ծրագրեր իրականացնելու մեծ հնարավորություններ:  Քննարկվել են այդ բացը լրացնելու նպատակով երկու երկրների գործարարների մասնակցությամբ  գործարար համաժողովներ  կազմակերպելու  հնարավորությունները:

Բարձր գնահատելով վերջին տարիներին ԵՄ-ի հետ Հայաստանի համագործակցության զարգացման հեռանկարները՝ էստոնացի պատգամավորները պատրաստակամություն են հայտնել աջակցելու Հայաստանին եվրաինտեգրման հարցում:

Հանդիպման ժամանակ քննարկվել են նաև տարածաշրջանային անվտնագությանն առնչվող խնդիրներ: Էդուարդ Շարմազանովը հավաստիացրել է, որ Հայաստանը եղել ու շարունակում է մնալ խաղաղ գոյակցության ջատագով և նույն դիրքերից էլ ԼՂ հիմնախնդրի լուծումը բացառապես համարում է խաղաղ բանակցությունների ճանապարհը: ԱԺ փոխնախագահը վերահաստատել է, որ ԼՂՀ-ն չի կարող ունենալ ավելի ցածր կարգավիճակ, քան ունի այսօր: Նա ընդգծել է, որ ԼՂՀ միջազգային ճանաչումն այլընտրանք չունի: Էդուարդ Շարմազանովը բարձր է գնահատել ԼՂ հիմնախնդրի վերաբերյալ Էստոնիայի իշխանությունների որդեգրած հավասարակշռված դիրքորոշումը: ԱԺ փոխնախագահը նշել է, որ Հայաստանի իշխանությունները վճռական են ժողովրդավարական բարեփոխումների արդյունավետ շարունակականության հարցում:

Հանդիպման ժամանակ քննարկվել են նաև խորհրդարանական բարեկամական խմբերի փոխայցերին, միջազգային կառույցներում երկու երկրների խորհրդարանականների համագործակցությանը, Հայոց ցեղասպանության միջազգային ճանաչմանը, հայ-թուրքական հարաբերություններին առնչվող հարցեր:

 ԵԺԿ գագաթնաժողովին Րաֆֆի Հովհաննիսյանի մասնակցության հարցը ԵԺԿ և ՙԺառանգություն՚ կուսակցության միջև սկանդալի առարկա է դարձել: Ամեն ինչ սկսվել է այն բանից, որ ՙԺառանգություն՚ կուսակցության վարչության քարտուղար Սետփան Սաֆայանը ԶԼՄ-ներից մեկում հրապարակված հարցազրույցում հայտարարել էր, որ կուսակցությունը դեռ չի քննարկել Վիեննայում Եվրոպայի ժողովրդական կուսակցության ընդլայնված գագաթնաժողովին մասնակցության հարցը:

Հունիսի 12-ին ԵԺԿ առաջնորդ Վիլֆրեդ Մարթենսի անունից նամակ է ստացվել, որում նա նշում է, թե Րաֆֆի Հովհաննիսյանը հրավիրված չէ մասնակցելու հունիսի 20-ին Վիեննայում մեկնարկող ԵԺԿ ընդլայնված գագաթնաժողովին, քանի որ ԵԺԿ գագաթնաժողովի հրավիրյալները քաղաքական ընտանիքին պատկանող կուսակցությունների ներկայացուցիչներ են, որոնք հանդիսանում են պետության կամ կառավարության ղեկավար: ՙՀայաստանի պարագայում նախագահ Սերժ Սարգսյանը նաև կառավարող կուսակցության առաջնորդն է: ՀՀԿ-ն ԵԺԿ-ի հավատարիմ գործընկերն է, և մենք լիովին վստահում ենք Սերժ Սարգսյանին՚, - ասվում է Մարթենսի նամակում:

Մարթենսի նամակը ՙԺառանգությունում՚ համարում են տարօրինակ և զվարճալի, քանի որ ԵԺԿ առաջնորդը խոսում է մի խնդրի մասին, որը կուսակցությունում չի էլ քննարկվել, և, ավելին, կուսակցությունից գագաթնաժողովին մասնակցության ոչ մի հայտ չի ներկայացվել: ՙՏվյալ դեպքում անհասկանալի է, թե ում և ինչին է պատասխանում ԵԺԿ ղեկավարը՚, - ասվում է ՙԺառանգության՚ հայտարարությունում:

Նրա ներկայացուցիչների կարծիքով, ԵԺԿ առաջնորդն, անշուշտ, ինքը պետք է որոշի, թե ով է մասնակցում գագաթնաժողովին, նա նույնիսկ իրավունք ունի հրավիրել նրանց, ովքեր կեղծում են ընտրությունները և գործում եվրոպական արժեքների հակառակ, ում սատարում է նաև ԵԺԿ: ՙՄեզ նաև չի թվում, թե ՙԺառանգությանը՚ հասցեագրված նամակը Սերժ Սարգսյանի նկատմամբ իրենց սերը ցուցադրելու լավագույն առիթն է: Հենց այդ հանգամանքը լավագույնս բացատրում է, թե ինչու ՙԺառանգությանը հասցեագրված՚ նամակը ուղարկվել է նաև ՀՀԿ և ՕԵԿ: ԵԺԿ առաջնորդին արժե մտածել այն մասին, թե ով է նրա համար այդպիսի անհեթեթ իրավիճակ ստեղծել և նրա անունն օգտագործում է ՀՀԿ առաջնորդի վարկանիշը բարձրացնելու համար՚, - ասվում է նամակում:

Հիշեցնենք, որ 2012 թվականի փետրվարին ՙԺառանգությունը՚, ՀՀԿ-ն և ՕԵԿ-ը անդամագրվել են ԵԺԿ-ին որպես դիտորդ:

 Վարչապետ Տիգրան Սարգսյանին կարող են զոհաբերել հանուն իշխանական բուրգի հետագա պահպանման, և օֆշորային սկանդալն այդ սցենարի մի մասն է: Հունիսի 14-ին մամուլի ասուլիսում այդպիսի կարծիք է հայտնել ԱԺ ՀԱԿ խմբակցության պատգամավոր  Արամ Մանուկյանը:

Հիշեցնենք, որ վարչապետ Տիգրան Սարգսյանը հայտարարություն էր ներկայացրել Hetq.am կայքում հրապարակված` ՙՈվ է Փայլակ Հայրապետյանին զրկել  գույքից. օֆշորային եռյակ՚ հրապարակման կապակցությամբ` խնդրելով ուսումնասիրել և հետաքննել հրապարակված նյութը: Համաձայն նշված հրապարակման, Կիպրոսում գրանցված WLISPERA HOLDINGS LIMITED ընկերության բաժնետերերն են հանդիսանում ՀՀ վարչապետ Տիգրան Սարգսյանը, Արարատյան թեմի առաջնորդ, արքեպիսկոպոս Նավասարդ Կճոյանը և ալմաստի բիզնեսով զբաղվող Աշոտ Սուքիասյանը: Վարչապետը բազմիցս հայտարարել է, որ  ոչ Կիպրոսում, և ոչ էլ օֆշորային այլ գոտիներում ոչ ոքի չի գրանցել և ոչ ոքի չի լիազորել իր անունից գրանցել որևէ կազմակերպություն:

Մանուկյանի ասելով, թեև ինքը չի կասկածում այդ հրապարակման ճշմարտացիությանը, այդուհանդերձ, վարչապետը բնավ միակ պաշտոնյան չէ, ում վերաբերյալ վարկաբեկող նյութեր կան: ՙՄեզ հայտնի պաշտոնյաներից յուրաքանչյուրն ունի իր ՙդոսիեն՚, որը դրված է բուրգի վերևում գտնվող մարդու` Սերժ Սարգսյանի սեղանին: Եվ այդ ՙդոսիեները՚ ցանկացած պահի կարող են օգտագործվել մեկ-երկու մարդու դեմ` մյուսներին վախեցնելու համար՚, - նշել է Մանուկյանը:

Ընդդիմադիր գործիչը նաև ներկայացում է համարում պետական կառույցների կողմից բազմաթիվ չարաշահումների և բյուջեի միջոցների վատնման վերաբերյալ Վերահսկիչ պալատի հաշվետվության ներկայացումը: Մանուկյանի կարծիքով, այդ շոուն կոչված է, մի կլողմից, տպավորություն ստեղծելու բարեփոխումների և իշխանության ներսում ՙինքնամաքրման՚ մասին, մյուս կողմից, դարձյալ, վախեցնելու ՙանհնազանդ՚ պաշտոնյաներին: Այդ համատեքստում Մանուկյանը նշել է իշխանության ներսում վախի մթնոլորտի առկայության մասին, և դրա տեսանելի վկայություններից մեկը էներգետիկայի նախարար Արմեն Մովսիսյանից ռուսական գազի գնի բարձրացման շուրջ պայմանագրի ստորագրման ստույգ ժամկետն իմանալու պատգամավորի անհաջող փորձերն են: ՙՄարդիկ վախեցած են: Ըստ երևույթին, ՙվերևից՚ ինչ-որ մեկը նախարարին սպառնացել է չհաղորդել այդ չարաբաստիկ փաստաթղթի ստորագրման ամսաթիվը: Հենց այդ պատճառով Մովսիսյանը ոչ մի կերպ չի կարողանում հիշել և պատասխանել իմ հարցին՚, - հայտարարել է Մանուկյանը:

Հիշեցնենք, որ ընդդիմությունն իշխանությանը մեղադրում է այն բանի համար, որ վերջինս ընտրությունների նախաշեմին հասարակությունից թաքցրել է գազի թանկացման արդեն իսկ կատարված փաստը:

 Հունիսի 14-ին Երևանում ինքնասպան է եղել հայտնի արձակագիր, դրամատուրգ Վրեժ Իսրայելյանը: Ինչպես ԱրմԻնֆո գործակալությանը հաղորդել են Ոստիկանությունում, Իսրայելյանի դիակը հայտնաբերվել է Վաղարշյանի անվան փողոցում գտնվող նրա բնակարանում: Որոշ տեղեկությունների համաձայն, Իսրայելյանը ինքնասպանություն է գործել հրազենի կիրառմամբ:

Վրեժ Իսրայելյանը ծնվել է 1949 թվականի ապիրլի 2-ին: Նա պատմվածքների, պիեսների, սցենարների հեղինակ է, որոնց թվում կան նաև Արցախյան պատերազմի վերաբերյալ գործեր (ՙՄահից առաջ և հետո՚, ՙԵրկրապահը և քաղաքականությունը՚, ՙԱյսպես դարձանք երկրապահ՚, ՙՄահապարտներ՚, ՙՔայլ՚, ՙԱռաջին գիծ՚, ՙԱնդրանիկ՚ և այլն):

 Հայաստանի առաջընթացը ՙԲաց կառավարման համագործակցություն՚ ծրագրի իրագործման գործում նրան կօգնի բարելավել այն ցուցանիշները, որոնք հաշվի է առնում ՙՀազարամյակի մարտահրավերներ՚ կորպորացիան: Այդ մասին հայտարարել է Հայաստանում ԱՄՆ դեսպան Ջոն Հեֆերնը հունիսի 14-ին Երևանում` ՙԲաց կառավարման համագործակցություն-Հայաստան՚ առաջին միջազգային համաժողովում:

ՙՀայաստանը ՙՀազարամյակի մարտահրավերներ՚ կորպորացիայի խնամառուն է և, իրագործելով ծրագիրը, կբարելավի իր ցուցանիշները կորպորացիայի ծրագրերի չափանիշներին համապատասխանելու համար՚, -  նշել է դեսպանը: Նա նաև նկատել է, որ ՙՀազարամյակի մարտահրավերներ՚ կորպորացիան դիտարկում է շուրջ 13 պարամետրեր, և կարևորագույն չափանիշներից մեկը կոռուպցիայի դեմ պայքարն է: ՙՀայաստանը դեռ չի հասել հակակոռուպցիոն պայքարի շեմին, և ԱՄՆ խրախուսում է առաջընթացն այդ ուղղությամբ՚, - հայտարարել է Հեֆերնը լրագրողներին: Նշենք, որ ՙՀազարամյակի մարտահրավերներ-Հայաստան՚ ծրագրի առաջին հնգամյա փուլի իրագործումը  շուրջ 177 մլն դ ոլար ներդրումներով ավարտվել է 2011 թվականի սեպտեմբերի վերջին: Ծրագիրը նպատակաուղղված էր գյուղական աղքատության հաղթահարմանը Հայաստանի համար կարևորագույն ոռոգման ենթակառույցների վերականգնման, ինչպես նաև ֆերմերներին, վերամշակման ճյուղի ներկայացուցիչներին և ոռոգման համակարգերի կառավարման կառույցներին ֆինանսական աջակցություն և խորհրդատվություններ տրամադրելու միջոցով:

Հայտնի հայ ձեռներեց, Sberbank CIB–ի համաղեկավար, Սկոլկովո բիզնես դպրոցի նախկին նախագահ Ռուբեն Վարդանյանը ՙՍոբչակ ժիվյոմ՚ ծրագրի ընթացքում հերքել է Հայաստանի նախագահ դառնալու իր ցանկության վերաբերյալ տեղեկատվությունը:

Գործարարը, մասնավորապես, հայտարարել է, որ ամեն մեկն իր գործով պետք է զբաղվի։ ՙԵս շատ բան եմ անում Հայաստանի համար, որպես Ռուսաստանի քաղաքացի` օգնում եմ իմ փոքր հայրենիքին, որոշ նախագծեր եմ իրագործում։ Բայց կարծում եմ, որ հաջողակ եմ այնտեղ, որտեղ անում եմ այն, ինչ կարողանում եմ անել՚,–  նշել է Վարդանյանը, հավելելով, որ Հայաստանն ունի իր խնդիրները` որպես կառավարման կլանային շատ կոշտ սկզբունքով միաազգ պետություն։  ՙԵս շատ լավ հարաբերություններ ունեմ Հայաստանի իշխանությունների հետ: Կարծում եմ, որ ես վատ քաղաքական գործիչ ու վատ ղեկավար եմ, չունեմ այն որակները, որոնք ինձ թույլ կտան լավ քաղաքական գործիչ լինել, հատկապես մի երկրում, որտեղ վարվեցողության մշակույթը և հոգեկերտվածքը տարբերվում են նրանից, որի պայմաններում ես մեծացել եմ՚, – պարզաբանել է նա։ Վարդանյանը նաև հերքել է այն տեղեկատվությունը, թե Հայաստանի իշխանությունները ձգտում են իրեն հեռու պահել քաղաքականությունից:

Ռուբեն Վարդանյանը հայազգի ռուսաստանաբնակ գործարար է, ում կարողությունը, ըստ Forbes–ի, կազմում է մոտ 0.5 մլրդ դոլար։ ՙՌուբեն և Վերոնիկա Վարդանյաններ և բարեկամներ՚ բարեգործական հիմնադրամն զբաղվում է ակտիվ գործունեությամբ Հայաստանում։ Հիմնադրամը 20 մլն դոլար է հատկացրել ՙՏաթևի վերածնման՚` 45 մլն դոլար ընդհանուր արժողության նախագծին, ինչպես նաև համաֆինանսավորում է Դիլիջանի միջազգային դպրոցի 120 մլն դոլար արժողությամբ շինարարությունը։

Ընդդիմադիր ՙԺառանգություն՚ խորհրդարանական խմբակցության ներկայացուցիչ Զարուհի Փոստանջյանը չի հավատում Սյունիքի նախկին մարզպետ Սուրեն Խաչատրյանի տան մոտ փոխհրաձգության փաստին առնչվող քրեական գործի լիակատար և անաչառ հետաքննության հնարավորությանը: Այդ մասին Փոստանջյանը հայտարարել է լրագրողների հետ զրույցում:

Ըստ խորհրդարանականի, արդեն այն փաստը, որ զինդատախազ Գևորգ Կոստանյանը միջադեպից երկու օր անց իր հայտարարություններով փորձում էր արդարացնել Սուրեն Խաչատրյանի կողմնակիցների գործողությունները, վկայում է, որ իրավապահ մարմինները չեն ցանկանում լիովին բացահայտել այդ հանցագործությունը: Հիշեցնենք, որ մամուլի ասուլիսում Կոստանյանը, մասնավորապես, հայտարարել էր, թե Սուրեն Խաչատրյանի տան վրա հարձակում է իրականացվել:

 ՙՌոստելոկոմ՚ ընկերությունը Հայաստանի իր հաճախորդներին ներկայացրել է ՙԳիշերային արագացում՚ նոր ծառայությունը, որը թույլ կտա ինտերնետի անսահմանափակ արագություն ապահովել գիշերային ժամերին: Այդ մասին հունիսի 14-ին հայտարարել է ՙՋի-Էն-Սի Ալֆայի՚ (հանդես է գալիս ՙՌոստելեկոմ՚ բրենդով) գլխավոր տնօրեն Հայկ Փարամազյանը դեպի Ռոստելեկոմի գրասենյակ կազմակերպված բլոգ տուրի ժամանակ:

Աբովյան քաղաքում գտնվող գրասենյակում ՙՌոստելեկոմը նշել է Բլոգերների միջազգային օրը` բլոգերների և լրագրողների մասնակցությամբ: Գլխավո տնօրենը հաղորդել է, որ ՙԳիշերային արագացում՚ ծառայությունը ՙՌոստելեկոմի՚ բոլոր բաժանորդներին հնարավորություն է տալիս հունիսի 15-ից մինչև հոկտեմբերի 1-ն ընկած ժամանակահատվածում գիշերային ժամերին (00:00-08:00) ինտերնետից օգտվել առանց արագության սահմանափակման: ՙՏեխնիկկապես ինտերնետային կապի արագությունը կսահմանափակվի 100 մեգաբիթով, սակայն, նման արագությունը հազիվ թե կարելի է սահմանափակում համարել՚ - ասել է Փարամազյանը:

Լրագրողների և բլոգերների հետ շփման ընթացքում գլխավոր տնօրենը պատմել է ընկերության ձեռքբերումների մասին` ծառայություների տրամադրման աշխարհագրության ընդլայնման և հաճախորդների բազայի արագ աճի առումով: Նա հիշեցրել է, որ ընկերությունն իր առաջխաղացումն սկսել է մարզերից, որտեղ մեծ ներուժ է տեսնում: Գյուղական համայնքներում, որտեղ կապի ոչ մի ենթակառույց չի եղել, ներկայում մեծ ժողովրդականություն է վայելում անլար ինտերնետային կապը: Շատերը գյուղերում օգտվում են Skype-ից: Ծառայություններից օգտվելու գործում առավել ակտիվություն է դրսևորում երիտասարդությունը, իսկ առավել ժողովրդականություն են վայելում ռուսական կայքերը: Բացի որակյալ լայնաշերտ ինտերնետից առաջիկայում, մոտավորապես հուլիսին, ՙՌոստելեկոմը՚ կսկսի տրամադրել հեռուստատեսային ծառայություններ, ասել է Փարամազյանը: Նրա հավաստմամբ, ընկերությունն արդեն ներկայացված է Հայաստանի 10 քաղաքներում, չհաշված գյուղական համայնքները, ևս 10 քաղաքներում կսկսի ծառայություններ  տրամադրել մինչև տարեվերջ:

 Հայաստանում իշխող Հանրապետական կուսակցության քաղաքական մոնոպոլիան, ամեն ինչը ճնմշելու նրա ձգտումները, աստիճանաբար երկիրը վերածում է Բրեժնևի ժամանակաշրջանի ԽՍՀՄ-ին, լճացման ժամանակաշրջանին, ինչը վերջնական արդյունքում բերեց այդ հզոր պետության փլուզմանը: Այս մասին այսօր լրագրողների հետ հանդիպմանը հայտարարել է ԱԺ ՀՅԴ խմբակցության ղեկավար Արմեն Ռուստամյանը: Նրա խոսքերով, քաղաքական լճացումն էլ ավելի մեծ վտանգ է ներկայացնում փոքրիկ Հայաստանի համար:

Դաշնակցականը ցինիզմ է համարում իշխանությունների հայտարարությունն այն մասին, որ իրենք, իբր, միաժաման հանդիսանում են և իշխանություն, և ընդդիմություն, ինչպես նաև սեփական չինովնիկների ու նախարարների ինքնաքննադատատության մարտավորությունը: Ռուստամյանն աբսուրդային է համարել նաև այն երևույթը, որ խորհրդարանի խոսնակը խոսում է պետական գույքի և բյուջետային միջոցների թալանչիների ու կողոպտիչների մասին, իսկ դրանց քրեական պատասխանատվության ենթարկելու ուղղությամբ հստակ քայլեր չեն ձեռնարկվում:

Միևնույն ժամանակ նա նշել է, որ ընդդիմությունը նույնպես պատասխանատվության իր բաժինն ունի իշխանությունների քաղաքական կամայականությունների համար: ՙԸնդդիմությունն այդպես էլ չկարողացավ ձևավորել մի ընդհանուր օրակարգ, հաղթահարել մասնատվածությունը և իրեն դիրքավորել որպես գործող իշխանություններին միասնական, անխախտ և գործող այլընտրանք՚,-նշել է նա:

Բացասական տեղեկատվությունը հայկական լրատվամիջոցներում խոչընդոտում է կառավարության աշխատանքին: Այս մասին այսօր Երևանում ընթացող` ՙԲաց կառավարման համագործակցություն - Հայաստան՚ առաջին միջազգային ֆորումում հայտարարել է ՀՀ վարչապետ Տիգրան Սարգսյանը:

Ըստ վարչապետի, լրատվամիջոցները նեգատիվ ֆոնի ներքո լուսաբանում են պետական մարմինների աշխատանքը, մշտապես մատուցվում է, որ բյուջետային միջոցները ծախսվել են անարդյունավետ, սական բացակայում են փաստերը: ՙՀասարակությունը հեշտությամբ է յուրացնում սենսացիոն նորությունները, իսկ ԶԼՄ-ները, օգտվելով դրանից, չեն ֆիլտրում ինֆորմացիան, ինչի արդյունքում էլ նեգատիվ նորությունների ալիքը տարածվում է հասարակության մեջ: Դա բերում է հասարակության անվստահությանը և բողոքներին, ինչն էլ, իր հերթին, խոչընդոտում է բարփոխումների իրականացմանը՚,-հայտարարել է վարչապետը:

Նա նաև նշել է, որ եթե տարածվում է ապատեղեկատվություն կամ զրպարտանք, ապա պետծառայողները պետք է դիմեն դատարան: ՙԲայց դա չի արվում, քանի որ դիտարկվում է որպես ԶԼՄ-ների վրա գործադրվող ճնշում՚,-եզրափակել է վարչապետը:

ԵԱՀԿ Մինսկի խմբի նախկին համանախագահ, Ադրբեջանում ԱՄՆ նախկին դեսպան Մեթյու Բրայզայի ղարաբաղյան հակամարտության և հայ-թուրքական հարաբերությունների վերաբերյալ նոր, ՙսենսացիոն հայտնագործությունն՚ առնվազն զարմացնում է: Այս մասին ԱրմԻնֆո գործակալության թղթակցի հետ զրույցում հայտարարել է Հայստանի Հանրապետական կուսակցության խմբակցության քարտուղար Հովհաննես Սահակյանը:

Ըստ Սահակյանի, հատկանշանականն այն է, որ Բրայզայի հայտարարության մեջ նշված է, որ ղարաբաղյան հակամարտության Մադրիդյան սկզբունքները պարունակում են Հայաստանի և Թուրքիայի միջև առևտրի հարաբերութոյւնները վերականգնելու պայմաններ: ՙՍակայն, ով ով, բայց Բրայզան, այն ժամանակ հանդիսանալով ԵԱՀԿ ՄԽ համանախագահ, պետք է տեղյակ լիներ, որ ղարաբաղյան հակամարտութան Մադրիդյան սկզբունքներում Թուրքիան չի հիշատակվում, անգամ որպես աշխարհագրական անվանում՚,-նկատել է պատգամավորը:

ՀՀԿ խմբակցության քարտուղարին վրդովեցրել է Բրայզայի հայտարարությունը նաև այն մասին, որ ադրբեջանցի Ռամիլ Սաֆարովի կողմից հայ սպա Գուրգեն Մարգարյանի սպանության փաստը ՙտխրեցրել՚ է հայերին: ՙՆման հայտարարություններն ընդհանրապես, համամարդկային արժեքների ոչ մի շրջանակների մեջ չեն տեղավորվում: Կարելի է կարծել, որ սպանության փաստը կարող էր առաջացնել այլ զգացումներ: Զարմացնում է նաև այն, որ նա այդպիսի հանգստությամբ է խոսում գազանային սպանության մասին, չդատապարտելով այն՚,-հայտարարել է Սահակյանը, Բրայզային կոչ անելով այսուհետ ձեռնպահ մնալ ղարաբաղյան հակամարտության և հայ-թուրքական հարեբերությունների վերաբերյալ դիլետանտ և պարադոքսալ մեկնաբանություններից, հետագա վարկաբեկումից խուսափոլու համար: