Ուրբաթ, 12 Հուլիսի 2013 07:57
Հայաստանը պետք է անցում կատարի նոր տնտեսական մոբիլիզացիոն քաղաքականության, հուլիսի 11-ին մամլո ասուլիսի ժամանակ այդպիսի կարծիք է հայտնել Հայրենական ապրանք արտադրողների միության /ՀԱԱՄ/ նախագահ Վազգեն Սաֆարյանը:
Նրա խոսքով, նշված անցման ուղղությամբ առաջին քայլերը կարող են լինել ներդրումների և զարգացման բանկի ստեղծումը, Էկոնոմիկայի նախարարություններից տուրիզմի և արդյունաբերության բլոկների անջատումը և դրանց հիման վրա առանձին նախարարությունների ստեղծումը, ինչպես նաև վերջիններիս և գյուղատնտեսության, էներգետիկայի և բնական պաշարների նախարարություններին տնտեսաֆունկցիոնալ գերատեսչությունների կարգավիճակ տալը, մինչդեռ դրանք ներկայումս միայն ֆունկցիոնալ են: Սաֆարյանի կարծիքով, այդ գերատեսչությունների կարգավիճակի փոփոխումը թույլ կտա վերջիններիս իրապես կառավարել նշված ճյուղերը`օգտագործելով մասնավոր հատվածի հետ պետության համագործակցության գործիքը:
Նա գտնում է, որ տնտեսական նոր քաղաքականության տարր պետք է հանդիսանա նաև պղնձի վերամշակման շղթայի փոփոխությունը. եթե այսօր Հայաստանը պղնձի խտանյութ է արտահանում`պղնձի 26-28% պարունակությամբ, ապա հետագա վերամշակման դեպքում կարելի է ստանալ սև պղինձ և զտած պղինձ`այդ մետաղի 99,9% պարունակությամբ, ինչպես նաև պղնձի հանքաքարից ստանալ այլ մետաղներ: Բացի այդ, պետական և մասնավոր հատվածի համագործակցությամբ անհրաժեշտ է Սյունիքի մարզում կառուցել պղնձահալման և քիմիամետալուրգիական կոմբինատ: Այդ համալիրն աշխատելու է պոչամբարներում կուտակված ավելի քան 1,5 մլրդ տոննա թափոնների հաշվին: Սաֆարյանի խոսքով, պոչամբարների վերամշակումը թույլ կտա ստեղծել 15 հազար նոր աշխատատեղ, ինչպես նաև բարելավել էկոլոգիական բալանսը դրանց գտնվելու վայրերում:
Նա նաև նշել է, որ անհրաժեշտ է նոր մոտեցումներ կիրառել նաև կաշվի և բրդի հայրենական արտադրության առնչությամբ: Օրինակ` գորգերի արտադրության ձեռնարկություններից մեկը պատրաստ է սկսել Հայաստանում կուտակված ավելի քան 4 հազար տոննա բրդի վերամշակումը, իսկ հայրենական կաշվի ձեռնարկությունների աշխատանքի վերսկսումը թույլ կտա 3 հազար նոր աշխատատեղ ստեղծել կոշիկի ֆաբրիկաներում:
Նրա խոսքով, Հայաստանի տնտեսության արդյունավետության ապահովման նպատակով անհրաժեշտ է նվազեցնել նաև հարկային ՙկոշտ և ֆիսկալ՚ բեռը 35-40%-ով, ինչը թույլ կտա ավելացնել հարկատուների բազան: ՀԱԱՄ ղեկավարը նշել է, որ վերոհիշյալ միջոցները պետք է հող նախապատրաստեն տնտեսության թռիչքաձև զարգացման համար, քանի որ վերջին մի քանի տարում արձանագրված`ՀՆԱ 6,3% միջին տարեկան աճը չի կարող լուծել աշխատավարձերի և կենսաթոշակների զգալի բարձրացման հարցերը: Պատասխանելով Հայաստանի պետական կառավարման համակարգի ներկայիս որակի պայմաններում մոբիլիզացիոն տնտեսական քաղաքականություն վարելու հնարավորության վերաբերյալ ԱրմԻնֆո-ի թղթակցի հարցին` ՀԱԱՄ ղեկավարը նշել է, որ եթե խորհրդային տարիներին կառավարչական կադրերը կադրային կայացման փուլեր էին անցնում, ապա ՙայսօր, ինչ-որ քաղաքական որոշման պատճառով, նախարարի պաշտոնում կարող է նշանակվել մարդ փողոցից՚, և այս իրավիճակը ևս հարկավոր է շտկել: >>>
|
Ուրբաթ, 12 Հուլիսի 2013 07:54
Կառավարությունը պետք է կանխարգելիչ գնային և կառուցվածքային քաղաքականություն իրականացնի էներգետիկայի ոլորտում`գազի և էլեկտրաէներգիայի սակագների բարձրացման հետևանքները մեղմելու նպատակով, հուլիսի 11-ին մամլո ասուլիսի ժամանակ այդպիսի կարծիք է հայտնել Հայրենական ապրանք արտադրողների միության /ՀԱԱՄ/ նախագահ Վազգեն Սաֆարյանը:
Նրա խոսքով, հուլիսի 7-ից գազի և էլեկտրաէներգիայի սակագների բարձրացման հետևանքով Հայաստանում արտադրվող ցեմենտի ինքնարժեքը կբարձրանա 20%-ով, որից 8% -ը բաժին է ընկնում գազի գնի և 12% -ը`էլեկտրաէներգիայի գնի բարձրացմանը: Նշված գործոնների ազդեցության հետևանքով արտադրվող ապակու ինքնարժեքը կբարձրանա 27-28%-ով, մոլիբդենի`5-6%-ով: Բացի այդ, գազի և էլեկտրաէներգիայի սակագների բարձրացումն ընտանիքի վրա ամեն ամիս անդրադառնալու է միջինը 7-8 հազար դրամ ($17,5-20) լրացուցիչ ծախսերով, միջինը ևս 2 հազար դրամով կավելանան հասարակական տրանսպորտի ծախսերը:
Միաժամանակ ՀԱԱՄ ղեկավարը գտնում է, որ գազի գնի բարձրացման`կառավարության նախատեսած 30% սուբսիդավորումը կմեղմացնի սոցիալական լարվածությունը: Ինչ վերաբերում է սուբսիդավորման աղբյուրներին, նրա կարծիքով, անընդունելի է, որպես այդպիսին, օգտագործել ՙՀայՌուսգազարդի՚`կառավարությանը պատկանող 20% բաժնետոմսերի վաճառքը: Սաֆարյանը գտնում է, որ գազի վերջնական սպառողների համար սակագները հարկավոր է զսպել նույն ՙՀայՌուսգազարդ՚ ընկերության ծախսերի մակարդակի նվազեցման ճանապարհով:
Բացի այդ, ՀԱԱՄ ղեկավարի կարծիքով, գազի և էլեկտրաէներգիայի սակագների բարձրացման հետևանքները մեղմելու համար անհրաժեշտ է զարգացնել այլընտրանքային էներգետիկան, ինչպես նաև ջերմաէլեկտրակայաններում և ՀԷԿ-երում էժան էլեկտրաէներգիայի արտադրման նոր հզորություններ գործարկել: Նա առաջարկում է կառուցել Երևանի ՋԷԿ-ի երկրորդ էներգաբլոկը`ներդնելով $400 մլն, և դրա համար օգտագործել Իրանից մատակարարվող գազը:
Բացի այդ, նրա կարծիքով, Իրան-Հայաստան գազատարով գազի բացթողման ավելացումը և ՙԳազպրոմի՚ համաձայնությամբ այն տարանցիկ մայրուղու վերածելը թույլ կտա Հայաստանին լրացուցիչ միջոցներ ստանալ գազի տարանցման դիմաց:
Պատասխանելով Հայաստանով իրանական գազի տարանցմանը Ռուսաստանի համաձայնության հնարավորության վերաբերյալ ԱրմԻնֆո-ի թղթակցի հարցին`Սաֆարյանը նշել է, որ ՙռուս գործընկերների հետ հանդիպելիս մենք միշտ դրույթ ենք առաջադրում, թե միությունը ամուր և հարատև է, երբ դաշնակիցներն ուժեղ են: Եվ եթե Հայաստանը ՀԱՊԿ անդամ է, իսկ Ռուսաստանը մեր երկրի ռազմավարական դաշնակիցն է, մեր երկիրը պետք է աշխատանք տանի որպես հզոր դաշնակից իր կայացման ուղղությամբ, և դրա համար մենք պետք է Ռուսաստանի հետ միասին արդյունավետ օգտագործենք մեր ռեսուրսները՚:
Նա նշել է, որ 2012 թ. Իրանից Հայաստան է արտահանվել 488 մլն խմ գազ, ինչը չորս անգամ ավելի քիչ է Իրան-Հայաստան գազատարի թողունակությունից: ՀԱԱՄ ղեկավարի խոսքով, ինչպես այդ գազատարի հզորության լիակատար օգտագործման խնդրի լուծման, այնպես էլ Իրան-Հայաստան երկաթուղու կառուցման համար անհրաժեշտ է առաջնորդվել ոչ թե տնտեսական, այլ քաղաքական նպատակահարմարության դիրքերից: Նման մոտեցումը տեղին է նաև ՙՆաիրիտ գործարանի՚ աշխատանքի վերսկսման առնչությամբ`Իրանից գազի մատակարարումների հիման վրա, էլեկտրաէներգիայի և քլորոպրենային կաուչուկի մատակարարումների փոխարեն: Այս սխեման կարող է նպաստել նաև վերոհիշյալ երկաթուղու կառուցման տնտեսական արդյունավետության ապահովմանը: >>>
|
Ուրբաթ, 12 Հուլիսի 2013 07:52
Ադրբեջանի կողմից շուրջ $1 մլրդ գումարի սպառազինության ձեռք բերումը վտանգ է ներկայացնում ոչ միայն Հայաստանի և Լեռնային Ղարաբաղի, այլ նաև ողջ տարածաշրջանի համար, հայտարարել է Տարածաշրջանային հետազոտությունների կենտրոնի ղեկավար Ռիչարդ Կիրակոսյանը:
Նրա խոսքով, Հայաստանն այժմ գտնվում է շատ վտանգավոր իրավիճակում, և նման քայլը չպետք է անպատասխան մնա: ՙՑավոք, ստեղծված իրավիճակում Հայաստանն ստիպված է մասնակցել սպառազինությունների մրցավազքին`սեփական անվտանգությունն ապահովելու նպատակով՚,- ընդգծել է Կիրակոսյանը:
Միաժամանակ վերլուծաբանն ընդգծել է, որ չհայտարարված պատերազմի պայմաններում Հայաստանը կարողանում է դրական տեղաշարժերի հասնել`ղեկավարվելով ոչ թե քանակ, այլ որակ սկզբունքով, այդ թվում`սպառազինություն ձեռք բերելու առումով:
>>>
|
Ուրբաթ, 12 Հուլիսի 2013 07:48
Հայաստանի խորհրդարանական չորս ուժերի` ՀՅԴ, ՙժառանգության՚, Հայ ազգային կոնգրեսի և ՙԲարգավաճ Հայաստանի՚ ներկայացուցիչների հետ փակ հանդիպման ժամանակ ԵՄ ընդլայնման եւ եվրոպական հարեւանության քաղաքականության հարցերով հանձնակատար Շտեֆան Ֆյուլեն մտահոգություն է հայտնել Ռուսաստանի կողմից Ադրբեջանին հարձակողական զենքի վաճառքի առնչությամբ:
Հանդիպմանը մասնակցած պատգամավորների խոսքով, Ֆյուլեն այդ հարցը բարձրացրել է հանրապետության առջև ծառացած ընդհանուր մարտահրավերների համատեքստում:
Հանդիպման ընթացքում խոսք է գնացել նաև Հայաստանի կողմից ԵՄ հետ Ասոցացման համաձայնագրի առաջիկա նախաստորագրման մասին: Ֆյուլեն, մասնավորապես, հանդիպման մասնակիցներին հավաստիացրել է, որ այդ համաձայնագիրը Հայաստանին /կամ-կամ/ ընտրության առաջ չի կանգնեցնում /խոսքը վերաբերում է Հայաստանի կողմից ԵՄ հետ Ասոցացման համաձայնագրի նախաստորագրման և Ռուսաստանի նախաձեռնած Մաքսային միությանը հանրապետության հնարավոր անդամակցման հարցում հակասությանը-խմբ./:
Ավելին, եվրահանձնակատարը խոստացել է, որ Ասոցացման համաձայնագրի ստորագրումից հետո Հայաստանի առջև սեփական արտադրանքի իրացման նոր շուկաներ կբացվեն: Հանդիպման ընթացքում կողմերը քննարկել են նաև Հայաստանի ներքաղաքական հարցերը: >>>
|
Ուրբաթ, 12 Հուլիսի 2013 07:46
Անհրաժեշտ է համոզել միջազգային հանրությանը`ճանաչել Լեռնային Ղարաբաղի անկախությունը և դուրս բերել Արցախը շրջափակումից, հայտարարել է ֆրանսիացի խորհրդարանական Վալերի Բուաեն, հաղորդում է Azad or-ը:
Նրա խոսքով, ղարաբաղյան հակամարտության կարգավորման գործընթացում շատ բան կախված է ԵԱՀԿ Մինսկի խմբից: Նա ընդգծել է, որ առաջադրված նպատակներին հասնելու համար անհրաժեշտ է բարձրացնել միջազգային հանրության տեղեկացվածությունը ղարաբաղյան հակամարտության մասին, իսկ դրա համար հարկավոր է լուրջ լոբբիստական աշխատանք կատարել: >>>
|
Ուրբաթ, 12 Հուլիսի 2013 07:45
Բելառուսի խորհրդարանի կողմից Հայոց ցեղասպանության ճանաչման հեռանկարներն են քննարկել Ազգային ժողովի փոխնախագահ Էդուարդ Շարմազանովը և նրա բելառուսցի գործընկեր Վիկտոր Գումինսկին Մինսկում հանդիպման ժամանակ:
ԱԺ փոխնախագահը, մասնավորապես, տեղեկացրել է, որ 2015թ. միջազգային մակարդակով նշվելու է Հայոց ցեղասպանության 100-րդ տարելիցը: ՙՀայոց ցեղասպանության չճանաչումն ու ժխտումը ճանապարհ հարթեցին նացիզմի և ֆաշիզմի համար՚,- նշել է Էդուարդ Շարմազանովը՝ հույս հայտնելով, որ Բելառուսի խորհրդարանը ևս կանդրադառնա Հայոց ցեղասպանության ճանաչման գործընթացին:
Հանդիպմանն անդրադարձ է եղել նաև երկու երկրների խորհրդարանների փոխգործակցությանը` թե’ ԱՊՀ միջխորհրդարանական վեհաժողովի և թե’ ՀԱՊԿ խորհրդարանական վեհաժողովի շրջանակներում: >>>
|
Ուրբաթ, 12 Հուլիսի 2013 06:59
Աշխատանքայի ն այցով Մոլդովայի Հանրապետությունում գտնվող Նախագահ Սերժ Սարգսյանն այսօր Քիշնևում մասնակցել է Եվրոպական ժողովրդական կուսակցության (ԵԺԿ) Արևելյան գործընկերության առաջնորդների երրորդ գագաթնաժողովին, որտեղ քննարկվել են Արևելյան գործընկերության օրակարգային, ինչպես նաև Վիլնյուսի գագաթնաժողովի նախապատրաստական աշխատանքներին վերաբերվող հարցեր:
Ինչպես տեղեկացնում է ՀՀ նախագահի մամլո գրասենյակը, գագաթնաժողովում Սերժ Սարգսյանը հանդես է եկել ելույթով: Հանրապետության Նախագահն անդրադարձել է Արևելյան գործընկերության շրջանակներում համագործակցությանը, գործընկերության նախաձեռնությանն անդամագրվելով՝ Հայաստանի ստանձնած պարտավորությունների կատարման ընթացքին, երկրում իրականացվող բարեփոխումներին: Տարածաշրջանային զարգացումների համատեքստում Նախագահը խոսել է նաև էներգետիկ համագործակցությունը էներգետիկ թելադրանքի վերածելու՝ ադրբեջանական քաղաքականության անթույլատրելիության մասին, երբ պարտադրում են լռել ժողովրդավարական սկզբունքների և մարդու իրավունքների խախտումների բացահայտ դեպքերի ժամանակ անգամ:
Սերժ Սարգսյանն անդրադարձել է նաև Հայաստանի ապօրինի շրջափակման հարցին՝ շեշտելով, որ փակ սահմաններն իրենց բնույթով հակասում են Եվրոպական միության էությանն ու արժեհամակարգի առանցքին: Սերժ Սարգսյանը գագաթնաժողովի շրջանակներում մասնակցել է նաև համատեղ մամուլի ասուլիսին, որտեղ անդրադարձել է քննարկումների արդյունքներին և ներկայացրել Հայաստանի դիրքորոշումները մեր երկրի համար կարևորագույն մի շարք հարցերի վերաբերյալ: Նախագահը գագաթնաժողովի քննարկումները համարել է օգտակար և կառուցողական: Նա ընդգծել է, որ վստահ է՝ գագաթնաժողովն իր դրական ներդրումն ունեցավ ինչպես ԵԺԿ, այնպես էլ Արևելյան գործընկերության նպատակների իրականացման ճանապարհին: ՙՆախ և առաջ ցանկանում եմ շնորհակալություն հայտնել մոլդովական կողմին՝ այս գագաթնաժողովը հյուրընկալելու համար:
Ընդամենը մի քանի ամիս առաջ մենք Երևանում հյուրընկալեցինք համանման միջոցառում և շնորհակալ ենք պարոն Մարտենսին, ԵԺԿ Արևելյան գործընկերության գագաթնաժողովների ավանդույթը և ձևաչափը ձևավորելու համար:Գործընկեր պետությունների եվրամերձեցման գործընթացի կարևոր բաղադրիչներից մեկը եվրոպական քաղաքական կուսակցությունների հետ գործակցությունն է, քաղաքական մշակույթի և ի վերջո՝ արժեհամակարգի մերձեցումը: Եվրոպական ժողովրդական կուսակցությունը կարևոր դերակատարում ունի եվրոպական ինքնության տարածման, գործընկեր պետությունների հետ համագործակցության խորացման գործում:Այսօր մենք քննարկեցինք Արևելյան գործընկերության օրակարգային, ինչպես նաև Վիլնյուսի գագաթնաժողովի նախապատրաստական աշխատանքներին վերաբերող հարցեր: Մեզ համար սրանք շատ շոշափելի, կոնկրետ հարցեր են:
Արդյունավետ աշխատելու համար Արևելյան գործընկերությունը պետք է հասկանալի և հասու լինի գործընկեր պետության յուրաքանչյուր քաղաքացու համար: Մենք ինքներս մեզ պետք է հարցնենք` ինչպե՞ս է մեր այս կամ այն համաձայնագիրը հեշտացնում քաղաքացու կյանքը, ինչպես է այն ազդում Հայաստանի, Մոլդովայի, Ուկրաինայի, Վրաստանի քաղաքացու կյանքի որակի վրա: Լինի դա տնտեսության առաջընթաց, անվտանգության խնդիր, քաղաքական կայունության և ամրապնդված ժողովրդավարության տեսքով՝ մեր քաղաքացիները պետք է հստակ տեսնեն, թե ինչ իրենք ստացան այս գործընթացից:Արևելյան գործընկերության գոյության ավելի քան չորս տարիների ընթացքում ձևավորված համագործակցությունը ցույց է տալիս, որ այն իր մեջ պարունակում է մեծ ներուժ տարածաշրջանային համագործակցության և գործընկերության խորացման հարցերում: Մեր պատկերացման մեջ Արևելյան գործընկերությունն իր բնույթով համագործակցություն, այլ ոչ թե հակասություններ ստեղծելուն ուղղված նախաձեռնություն է, այն ուղղված չէ որևէ պետության կամ պետությունների խմբի դեմ: Այս գործընկերությունն ուղղված է բաժանարար գծերի վերջնական հաղթահարմանը:
Արևելյան գործընկերության շրջանակներում Հայաստանը մեծապես կարևորում է փակ սահմանների պրակտիկային վերջ դնելը: Խորը և համապարփակ ազատ առևտրի գոտու համաձայնագիրը, որը ներկայումս բանակցվում է Եվրոպական միության հետ, ուժի մեջ մտնելուց հետո չի կարող լիարժեք գործել, եթե Հայաստան-Թուրքիա սահմանը մնա փակ, ինչպես ներկայումս: Մենք կարծում ենք, որ Եվրոպական միությունը պետք է լրջորեն անդրադառնա փակ սահմանների հարցին, քանզի դրանց առկայության պայմաններում ԵՄ Մաքսային միության հետ առևտուրը չի կարող լինել արդյունավետ՚,-համատեղ մամուլի ասուլիսում ասել է Նախագահ Սերժ Սարգսյանը: >>>
|
Հինգշաբթի, 11 Հուլիսի 2013 12:24
ՙՄենք ենք մեր երկրի վաղվա տերը՚ շարժումը Հովհաննես Ղահրամանյանի գլխավորությամբ ստորագրահավաք է կազմակերպվում Արարատյան հայրապետական թեմի առաջնորդ Նավասարդ արքեպիսկոպոս Կճոյանին կարգալույծ անելու նախաձեռնության ներքո: Համապատասխան խնդրագիր կուղարկվի Ն.Ս.Օ.Տ.Տ. Գարեգին Բ Ամենայն Հայոց կաթողիկոսին: Ստորագրահավաքը կսկսվի հուլիսի 12-ին և կընթանա ամեն օր, ժամը 10:00-ից մինչև 21:00-ն Հյուսիսային պողոտա- Թումանյան խաչմերուկում: Հուլիսի սկզբից արդեն հավաքվել է 2500-ից ավելի ստորագրություն: ՙՆավասարդ Կճոյան հոգևորականը ամբողջովին հեռացել է եկեղեցուց և ներքաշվել գողական կյանքի մեջ: Այս մարդուն իր Բենթլիով կարելի է տեսնել միմիայն մեծ բիզնեսի ներկայացուցիչների կողքին: Ո՞վ է երբևէ Կճոյանից հոգևոր հարցերի, իր հոտի խնդիրների մասին գեթ մեկ բառ լսել: Ո՞վ է նրան գեթ մեկ անգամ տեսել եկեղեցու կողքին: Այս մարդը դարեր շարունակ մեր ազգի ինքնությունը պահպանած եկեղեցու վերջին մեղքն է, նրա խայտառակությունը: Կճոյանն այնքան է ներքաշվել գողական կյանքի մեջ, որ, բացի օֆշորային սկանդալից, իր մաֆիոզի դիրքին հարիր չի համարում պարզաբանել իրեն ուղղված հարցերը: Իր պահվածքով Կճոյանը խայտառակում է մեր ազգը, և, եթե Կաթողիկոսը որևէ կերպ չարձագանքի Կճոյանին կարգալույծ անելու մեր պահանջին, ուրեմն ինքը ևս նույն մաֆիայի մաս է կազմում` դրանից բխող բոլոր հետևանքներով՚, - ասվում է նախաձեռնության տարածած հաղորդագրության մեջ: >>>
|
Հինգշաբթի, 11 Հուլիսի 2013 10:46
Պետական աջակցությամբ Արարատի մարզի գյուղացիական տնտեսություններին տրամադրված դիզելային վառելիքի ոչ նպատակային օգտագործման գործով ձերբակալվել է Արարատի մարզպետարանի գյուղատնտեսության և բնապահպանության վարչության նախկին պետ Տիգրան Վիրաբյանը: Ըստ Հատուկ քննչական ծառայության, Վիրաբյանը կասկածվում է առանձնապես խոշոր չափերով պետական միջոցների յուրացում կատարելու համար` նախատեսված ՀՀ ՔՕ 179-րդ հոդվածի 3-րդ մասի 1-ին կետով:
Նշենք, որ այդ գործի շրջանակներում արծարծվում է նաև խորհրդարանի խոսնակ Հովիկ Աբրահամյանի եղբոր` Ջոնիկ Աբրահամյանի անունը, ով, Արարատի մարզում ստուգումների արդյունքների վերաբերյալ Ֆինանսների նախարարության վերահսկիչ տեսչության հաշվետվության համաձայն, արտոնյալ գներով 48 հազար լիտր դիզելային վառելիք է ստացել, որը պետության կողմից նախատեսված էր սոցիալապես անապահով գյողաբնակների համար:
Երկրի քաղաքական շրջանակներում տարածված վարկածի համաձայն, Ջոնիկ Աբրահամյանի նկատմամբ գործը վարչապետ Տիգրան Սարգսյանի պատասխանն էր կառավարության հասցեին Հովիկ Աբրահամյանի քննադատությանը Վերահսկիչ պալատի հաշվետվության հրապարակումից հետո, որում խոսք է գնում կառավարական կառույցներում պետական միջոցների լայնածավալ յուրացումների մասին:
Այդուհանդերձ, ՀՀԿ մոտ աղբյուրների համաձայն, ՀՀ գործադիր մարմնի նիստի ժամանակ նախագահը վարչապետ Տիգրան Սարգսյանին ՙհանդիմանել է՚ այն բանի համար, որ վերջինս ֆինանսական տեսուչների է ՙուղարկել Աբրահամյանների ընտանիք՚: Աղբյուրներրի համաձայն, նախագահին դուր չի եկել այն, որ կառավարող կուսակցության բարձրաստիճան ներկայացուցիչները բացահայտ միմյանց քննադատում են, մեկը մյուսի մոտ պետական տեսուչների են ուղարկում: Ավելի վաղ Սերժ Սարգսյանը ՙնախատել էր՚ խորհրդարանական մեծամասնությանը, մասնավորապես, խորհրդարանի ղեկավարությանը ՎՊ հաշվետվության ժամանակ նրանց վարքագծի առնչությամբ: Նշենք, որ ՎՊ հաշվետվությունից հետո Հովիկ Աբրահամյանը սուր քննադատության էր ենթարկել կառավարական կառույցների գործունեությունը` պետական միջոցների ոչ նպատակային օգտագործման համար: Ինչից հետո Ֆինանսների նախարարության տեսչությունը հրապարակել էր Աբրահամյանի ընտանիքի կողմից արտոնյալ գներով դիզելային վառելիք ստանալու վերաբերյալ տվյալները:
Նշենք, որ, չնայած բարձրաստիճան հանրապետականների այն հավաստիացումներին, որ կուսակցության ներսում տարաձայնություններ չկան, վարկաբեկիչ նյութերի պատերազմը բարձրաստիճան հանրապետականների շրջանում շարունակվում է: Այսպես, ՙԺողովուրդ՚ թերթն այսօր անդրադարձել է կառավարության կողմից ՙՇանհայ-2012՚ ցուցահանդեսի կազմակերպման համար տրամադրված 2 մլն դոլարի ոչ նպատակային օգտագործման թեմային: Հիշեցնենք, որ Չինաստանում դեսպան է վաչապետ Տիգրան Սարգսյնի եղբայրը: Թերթի համաձայն, այն դեպքում, երբ պետբյուջեի միջոցները մշտապես չեն բավականացնում հրատապ սոցիալական խնդիրները լուծելու համար, տարբեր ցուցահանդեսներ կազմակերպելու համար գտնվում են միջոցներ, որոնք հետագայւոմ փոշիանում են` ոչ ըստ նշանակության: Թերթը խոստանում է հաջորդ համարում որոշակի տվյալներ հրապարակել այդ միջոցների փոշիացման վերաբերյալ:
Հիշեցնենք, որ վարչապետի անունը շոշափվում է նաև, այսպես կոչված, օֆշորային սկանդալում: Կիպրոսում իբր վարչապետի և Արարատյան թեմի առաջնորդ Նավասարդ արք.ԿՃոյանի անուններով գրանցվել է օֆշորային ընկերություն, որը, ԶԼՄ-ների տեղեկություններով, դարձել է գործարար Փայլակ Հայրապետյանի հարկադրված սնանկացման արդյունքում ստացված միջոցների օգտառուն: Ի դեպ, Փայլակ Հայրապետյանին ՙքցել՚ է ԿՃոյանի սանիկը:
ՀՀԿ-ում ԱրմԻնֆոյի չեզոք աղբյուրների համաձայն, այժմ վարչապետ Տիգրան Սարգսյանի և խոսնակ Հովիկ Աբրահամյանի միջև ծավալվել է իսկական ՙպատերազմ՚, որն արժե դիտրակել 2018 թվականի նախագահական ընտրությունների պրիզմայով: Աղբյուրի համաձայն, Սարգսյանն ունի լուրջ նախագահական նկրտումներ: Սակայն Հովիկ Աբրահամյանի գլխավորած հանրապետական թևը ձգտում է այդ աթոռին տեսնել իր համար ավելի ընդունելի թեկնածուի: Աղբյուրի ասելով, հենց դրանով է պայմանավորված վարկաբեկիչ նյութերի պատերազմը և մերթ Սարգսյանի, մերթ Աբրահամյանի դեմ ՙփակ՚ տեղեկատվության մշտական նետումը ԶԼՄ-ներ: >>>
|
Հինգշաբթի, 11 Հուլիսի 2013 09:35
Աշխարհի առաջատար տնտեսությունների դժվարությունները կարող եմ վերաճել մի շարք երկրներում սոցիալական ճգնաժամի, ԱրմԻնֆո-ի թղթակցի հետ զրույցում այդպիսի կարծիք է հայտնել չինացի հայտնի տնտեսագետ, Կալիֆորնիայի համալսարանի պրոֆեսոր Xiaohua Yang-ը Երևանում կայացած երկօրյա գիտաժողովի ժամանակ`նվիրված համաշխարհային տնտեսության հետճգնաժամային գոյությանը և Չինաստանում տնտեսական բարեփոխումներին:
Փորձագետը համաձայնել է այն կարծիքին, որ լեռնահանքային արտադրանքի համաշխարհային պահանջարկի նվազումը /այդ թվում`Չինաստանի կողմից/ անխուսափելիորեն կհանգեցնի նաև Հայաստանում դրա վաճառքից եկամուտների զգալի կրճատմանը: Հարկ է նշել, որ լեռնահանքային արտադրանքին է բաժին ընկնում հայկական արտահանման շուրջ 40%-ը:
Տնտեսագետը նաև նշել է, որ հասարակության սոցիալական շերտավորման խնդիրը /չափազանց հարուստների և աղքատների/ շարունակում է խորանալ, ինչը ևս սոցիալական ճգնաժամի վտանգ է պարունակում: Այդ գործընթացը սաստկանում է կոռուպցիայի և տնտեսության մոնոպոլիզացիայի բարձր մակարդակով երկրներներում: Պրոֆեսորը միաժամանակ ընդգծել է, որ Հայաստանը մտավոր հարուստ ներուժ ունի, որի արդյունավետ օգտագործումը կարող է դուրս բերել երկիրը տնտեսական ճգնաժամից: Նա նաև նշել է, որ երկրին անհրաժեշտ է ընդլայնել առևտրատնտեսական հարաբերությունները հարևան երկրների հետ: >>>
|
Հինգշաբթի, 11 Հուլիսի 2013 09:33
Եվրամիությունը Հայաստանին ՙկամ, կամ՚ ընտրության առաջ չի դնում, հուլիսի 10-ին Երևանում հայտարարել է Ընդլայնման և Եվրոպական հարևանության քաղաքականության հանձնակատար Շտեֆան Ֆյուլեն: ՙՉեմ կարող ասել`արդյոք նման ճնշում գործադրվում է Ռուսաստանի կողմից, թեև հետևում եմ լուրերին, և ծանոթ եմ թե’ գազի գների բարձրացմանը, թե’ առաջացած մի շարք խնդիրներին: Սակայն գործընկերների հետ մեր հարաբերություններում ճնշումը տեղ չունի՚,- ընդգծել է նա:
Նրա խոսքով, եթե հարցադրում անենք`կսահմանափակի արդյոք Ասոցացման համաձայնագրի ստորագրումն այլ երկրների հետ Հայաստանի փոխգործակցությունը, պատասխանը միանշանակ ոչ կլինի: Ըստ որում, նա ավելացրել է, որ դա թույլ կտա Հայաստանին էլ ավելի ամրապնդել իր դիրքերը: Միաժամանակ նա ընդգծել է, որ ինտեգրացիոն երկու նախագծերի միջև պետք է տարրական համատեղելիություն լինի: ՙՄենք չենք ստիպում մեր գործընկերներին պակասեցնել Ռուսաստանի հետ հարաբերությունները: Նույնը մենք ասում ենք Մոսկվային: Մենք միմիայն կխրախուսենք ՌԴ հետ համագործակցությունն այն ոլորտներում, որոնք բխում են Հայաստանի շահերից՚,- ասել է Ֆյուլեն: >>>
|
Հինգշաբթի, 11 Հուլիսի 2013 09:32
Սպիտակի քաղաքապետ Գագիկ Սահակյանի նկատմամբ քրեական գործ է հարուցվել նրա կողմից նույն քաղաքի բնակչին ծեծի ենթարկելու փաստի առթիվ:
Ինչպես ԱրմԻնֆո գործակալությանը հաղորդել են Գլխավոր դատախազությունում, գործը հարուցվել է տուժած 71-ամյա Լևիկ Մարյանի հաղորդման հիման վրա, ով պնդում է, որ քաղաքապետ Գ.Սահակյանը ծեծել է իրեն: Միջադեպով զբաղվում է Լոռիի դատախազությունը:
Նշենք, որ, հայկական ԶԼՄ-ների համաձայն, միջադեպը տեղի է ունեցել նախօրեին: Մարյանի գանգատներից դժգոհ Սպիտակի քաղաքապետ Գագիկ Սահակյանը նրան հարվածել է, ինչի արդյունքում Մարյանը վայր է ընկել և վնասվածք ստացել: Ինքը` Սահակյանը, հերքում է այդ վարկածը, պնդելով, թե միայն, բռնելով Մարյանի ձեռքից, նրան դուրս է տարել իրադարձության վայրից: Ընդ որում Սահակյանը Մարյանին անվանում է ՙխելապակաս՚ և ենթադրում, որ նա կարող էր վնասվածք ստանալ, ասենք, ընտանեկան ծեծկռտոցի արդյունքում: >>>
|
Չորեքշաբթի, 10 Հուլիսի 2013 09:04
Սյունիքի նախկին մարզպետ Սուրիկ Խաչատրյանի տան մոտ հունիսի 1-ին տեղի ունեցած արյունալի միջադեպին առնչվող գործով մեղադրանք է առաջադրվել սպանված Ավետիք Բուդաղյանի եղբորը` Լեռնային Ղարաբաղի պաշտպանության բանակի զորամասերից մեկի հրամանատար, գնդապետ Արտակ Բուդաղյանին: >>>
|
Չորեքշաբթի, 10 Հուլիսի 2013 09:03
Կառավարության հուլիսի 10-ի որոշման համաձայն, Սյունիքի մարզպետք է նշանակվել 38-րդ ընտրատարածքից ԱԺ պատգամավոր Վահե Հակոբյանը` Զանգեզուրի պղնձամոլիբդենային կոմբինատի սեփականատեր Մաքսիմ Հակոբյանի որդին: Ավելի վաղ նրա թեկնածությունն այդ պաշտոնի համար առաջադրել էր Հայաստանի նախագահ Սերժ Սարգսյանը: >>>
|
Երեթշաբթի, 9 Հուլիսի 2013 13:50
ՀՀ տրանսպորտի և կապի նախարարությունը մտադիր է անել հնարավոր ամեն բան, որպեսզի նվազագույնի հասցնի հասարակական տրանսպորտով երթևեկության գների աճը`կապված հուլիսի 7-ից գազի գների աճի հետ: Այդ մասին հուլիսի 9-ին լրագրողների հետ զրույցում հայտարարել է տրանսպորտի և կապի նախարար Գագիկ Բեգլարյանը: >>>
|
Երեթշաբթի, 9 Հուլիսի 2013 12:59
Հակամարտության կողմերի ցանկության դեպքում Իրանը պատրաստ է միջնորդ հանդիսանալ ղարաբաղյան հակամարտության կարգավորման հարցում: Ինչպես հաղորդում է իրանական IRINN լրատվական ալիքը, այդ մասին մամլո ասուլիսի ժամանակ հայտարարել է Իրանի ԱԳՆ ներկայացուցիչ Աբբաս Արագչին: >>>
|
Երեթշաբթի, 9 Հուլիսի 2013 12:57
Հայաստանի ֆուտբոլի հավաքականի գլխավոր մարզիչ Վարդան Մինասյանը մեկնաբանել է կիսապաշտպան Հենրիխ Մխիթարյանի Դոնեցկի ՙՇախտյորից՚ Դորտմունդի ՙԲորուսիա՚ տեղափոխվելը: >>>
|
Երեթշաբթի, 9 Հուլիսի 2013 12:04
Մոլդովացի փաստաբան Աուրելիա Գրիգորիուի վարքագիծը Հայաստանի խորհրդարանում Ադրբեջանի ծախսած մեծ փողերի ազդեցության արդյունք է: Այդ մասին հուլիսի 9-ին մամուլի ասուլիսում հայտարարել է Հայ Յեղափոխական Դաշնակցության Բյուրոյի Հայ դատի եւ քաղաքական հարցերի գրասենյակի տնօրեն Կիրո Մանոյանը: >>>
|
Երեթշաբթի, 9 Հուլիսի 2013 12:01
Հուլիսի 9-ից մինչև 10 ներառյալ գիշերվա առաջին կեսին և ցերեկվա երկրորդ կեսին Հայաստանի հյուսիսային շրջաններում, իսկ հուլիսի 11-13-ը հանրապետության տարածքի զգալի մասում սպասվում են կարճատև անձրևներ և ամպրոպ, առանձին տեղամասերում հնարավոր է կարկուտ: Ինչպես հաղորդում է ԱԻՆ Հայհիդրոմետ ծառայությունը, քամին կլինի մինչև 2-7 մ/վ հարավ-արևմտյան, ամպրոպի ժամանակ հնարավոր է քամու ուժգնացում` մինչև 15-20 մ/վ: Օդի ջերմաստիճանն աստիճանաբար կնվազի 2-3 աստիճանով: Հուլիսի 9-11-ը Երևանում տեղումների հավանականությունը է փոքր է: Իսկ հուլիսի 12-13-ը սպասվում են կարճատև անձրևներ և ամպրոպ: >>>
|
Երեթշաբթի, 9 Հուլիսի 2013 11:58
ԵՄ ընդլայնման եւ եվրոպական հարեւանության քաղաքականության հարցերով հանձնակատար Շտեֆան Ֆյուլեն այցելում է Երեւան, եւ ծրագրված է նրա հուլիսի 9-ի երեկոյան կժամանի Երևան: >>>
|