Երկուշաբթի, 24 Սեպտեմբերի 2018 14:32

Արմինֆո. Հանրապետական կուսակցությունը որևէ տրամաբանական կապ չի տեսնում երևանյան ընտրությունների արդյունքների և ՀՀ վարչապետ Նիկոլ Փաշինյանի՝ խորհրդարանը ցրելու մտադրության միջև: Այդ մասին ԱրմԻնֆո-ի թղթակցի հետ զրույցում հայտարարել է ԱԺ փոխնախագահ Էդուարդ Շարմազանովը:

 

<Նույնիսկ եթե երևանյան ընտրություններին մասնակցությունը կազմեր 100% և 100%-ն էլ իր ձայնը տար <Իմ քայլը> դաշինքին, ինչ կապ ունի դա խորհրդարանի, վերջինիս հնարավոր ցրման և ենթադրվող վաղաժամկետ ընտրությունների հետ: ՀՀ Սահմանադրությունը հստակ տարանջատում է իշխանության բոլոր ճյուղերը և սահմանափակում դրանց իրավունքներն ու պարտականությունները, տեղական ինքնակառավարման մարմիններն ազդեցություն չունեն օրենսդիր իշխանության վրա, ինչպես և իշխանության այլ ճյուղերը: Ինչ վերաբերում է Ազգային ժողովին, այն ընտրվել է 2017 թվականին և պետք է գործի  մինչև 2022 թվականը: Հատկանշական է, որ ընտրությունները ճանաչել են ոչ միայան միջազգային հեղինակավոր կառույցները, այլ նաև դրանց մասնակցող քաղաքական ուժերը, այդ թվում՝ <Ելք> դաշինքը Նիկոլ Փաշինյանի հետ միասին: Նույն խորհրդարանն ամիսներ առաջ Փաշինյանին ընտրել է վարչապետ, եթե, Փաշինյանի տրամաբանությամբ, այն լեգիտիմ չի եղել, ստացվում է, որ նրա ընտրություններն էլ լեգիտիմ չեն եղել: Վարչապետի բոլոր հայտարարոթյունները որևէ տրամաբանական քննադատության չեն դիմանում>,- հայտարարել է Շարմազանովը:

 

Ինչ վերաբերում է վարչապետի հայտարարությանը, որ խորհրդարանական ընտրություններն անհրաժեշտ են երկրում ավելի գրավիչ ներդրումային միջավայր ձևավորելու և տնտեսական զարգացման հիմքեր ստեղծելու համար, փոխխոսնակն այստեղ ևս որևէ տրամաբանություն չի տեսնում: <Իսկ ինչո՞վ է խորհրդարանը խանգարում ներդրողներին կամ երկրի տնտեսական զարգացմանը: Նշեք թեկուզ մեկ դեպք, երբ խորհրդարանը տորպեդահարել է Փաշինյանի կաբինետի այս կամ այն նախաձեռնությունը՝ հատկապես, եթե դրանք ուղղված են երկրի զարգացմանը: Այսուհետ էլ մտադիր չենք անել դա, քանի որ ելնում ենք ոչ թե նեղ կուսակցական շահերից, այլ՝ պետության ու ժողովրդի շահերից: Այնպես որ՝ խորհրդարանը ոչ մի կերպ չի խանգարել և մտադիր չէ խանգարել նախարարների կաբինետի աշխատանքին: Այս առումով նույնպես Փաշինյանի հայտարարությունները քննադատության չեն դիմանում>,- հայտարարել է Շարմազանովը:

 

Անդրադառնալով խորհրդարանը ցրելու շուրջ խորհրդարանական ուժերի հետ բանակցություններ սկսելու Փաշինյանի նախաձեռնությանը՝ Շարմազանովը հայտնել է, որ ՀՀԿ-ն դեռ չի քննարկել այն և որևէ որոշում այդ առնչությամբ չի կայացրել՝ կրկին նշելով, որ որևէ անհրաժեշտություն բոլոր այդ քայլերում չկա: Խոսելով երևանյան ընտրությունների արդյունքների մասին՝ փոխխոսնակը նշել է, որ <Իմ քայլը> դաշինքի հաղթանակին երբեք չի կասկածել: <Սակայն, արդյունքները վերլուծության կարիք ունեն: Ամեն բան այդքան պարզունակ չէ, ինչպես առաջին հայացքից է թվում: Մասնակցության ցուցանիշը, հաշվի առնելով ընտրությունների քաղաքականացվածությունը, հետհեղափոխական էյֆորիան, վարչապետի բարձր վարկանիշը, ով ուղղակիորեն վարեց ողջ նախընտրական արշավը, չափազանց ցածր էր: Մեր հասցեին մեղադրանքները, թե մենք մարդկանց <գազելներով> տեղամասեր ենք տեղափոխել՝ կաշառելով նրանց, իշխանությունների դեմ է շրջվում: Ստացվում է, որ Փաշինյանի վարկանիշը, լուսավոր ապագայի և վաղաժամկետ խորհրդարանակն ընտրությունների խոստումներն ընտրողների համար ավելի մեծ կշիռ չունեն,քան <գազելներով> նրանց ընտրատեղամասեր տեղափոխելը>,- ամփոփել է Շարմազանովը:

 

Նշենք, որ վարչապետ Նիկոլ Փաշինյանը Նյու Յորքում հայ համայնքի ներկայացուցիչների հետ հանդիպմանը հայտարարել է, որ առաջիկայում բանակցություններ կհրավիրի խորհրդարանական և ոչ խորհրդարանական քաղաքական ուժերի հետ` քննարկելու խորհրդարանական արտահերթ ընտրությունների ժամանակացույցն ու պայմանները: «Կար տրամադրություն, որ դրանք անցկացվեն մինչ հաջորդ տարվա հունիս, բայց այն սպասողական վիճակը, որ ունեն պոտենցիալ ներդրողները, որոնց հարկավոր են երկարաժամկետ քաղաքական արձանագրումներ, ինչպես նաև տնտեսական միջավայրը բարենապաստ դարձնելու համար, ընտրությունները պետք է անցկացնենք ավելի վաղ, որպեսզի առավել շուտ սկսենք տնտեսության վերականգնման ընթացքը>,- ասել է նա: