Արմինֆո.Առողջական խնդիրների և դեղերի ձեռք բերման դժվարության պատճառաբանությամբ քաղաքացու կողմից կառավարության 3–րդ մասնաշենքում ռումբի ահազանգ կատարելու առնչությամբ առողջապահության նախարարությունը պարզաբանում է հետևյալը.
Մարզային գրանցում ունեցող քաղաքացին ունի առողջական խնդիրներ, վիրահատվել է Ուռուցքաբանության ազգային կենտրոնում: Բուժման հետագա պատշաճ ընթացքը կազմակերպելու նպատակով, համաձայն միջազգային ուղեցույցների, քաղաքացուն նշանակվել է ԲՑԺ իմունոթերապիա, որի դեղերը, սակայն, ՀՀ-ում գրանցված չեն, չկան: Որպես փոխարինող միջոց նշանակվել են քիմիոպրեպարատներ:
Քաղաքացին դեղերի ձեռք բերման հարցով չի դիմել առողջապահության նախարարություն` ոչ «թեժ գծով», ոչ ընդունելության դիմումով, ոչ էլ նամակով` քարտուղարություն, գրանցման վայրի պոլիկլինիկա` ևս:
Առողջապահության նախարարությունը պատրաստ է հնարավորության սահմաններում աջակցել քաղաքացուն, ինչի ուղղությամբ արդեն քայլեր ձեռնարկվել են:
Նախօրեին ՀՀ ոստիկանության հասարակայնության հետ կապերի վարչության պետի տեղակալ Էդգար Ջանոյանն ԱրմԻնֆո-ի թղթակցին հայտնել էր, որ ոստիկանությունը հաստատել է փաստը, որ քաղաքացին սպառնացել է պայթեցնել Առողջապահության նախարարության շենքը: «Քաղաքացու ինքնությունը պարզվել է: Փաստի առնչությամբ պատրաստվում են նյութեր, քննություն է ընթանում՚,- նշել էր նա: ՀՀ ԱԻՆ-ում հայտնել են, որ համապատասխան աշխատանքների արդյունքում շենքում վտանգավոր ոչինչ չի հայտնաբերվել: Նշենք, որ առողջական խնդիրներ ունեցող ոմն քաղաքացի եկել էր Առողջապահության նախարարություն և բուժման համար դեղորայք պահանջել: Ըստ որում, նա սպառնացել էր պայթեցնել նախարարության շենքը, եթե համապատասխան օգնություն չցուցաբերվի իրեն: