Արմինֆո. Երկրում ծանր քաղաքական ճգնաժամն իր լուծումը գտավ սահմանադրական, օրինական և խաղաղ ճանապարհներով, ինչն, առաջին հերթին, Հայաստանի Հանրապետության բնակչության և քաղաքական էլիտայի մեծագույն ձեռքբերումներից էր: Այդ մասին հայտարարել է Հայաստանում Եվրամիության պատվիրակության ղեկավար Պյոտր Սվիտալսկին Վանաձորում Եվրոպայի օրերի շրջանակում:
«Այդ զարգացումները և իրադարձությունները ևս մեկ անգամ ապացուցեցին, որ Հայաստանի երիտասարդությունը մեծ ներուժ ունի, և այդ ներուժը պետք է օգտագործել երկրի զարգացման համար: Նրանք ունեն բավականին մեծ ակնկալիքներ, նրանք ցանկանում են ապրել մի երկրում, որը ձերբազատված է կոռուպցիայից, մի երկրում, որը պատշաճ ու արդյունավետորեն կառավարվում է, մի երկրում, որն ունի անկախ, անկողմնակալ, արդար դատաիրավական համակարգ: Նրանք ցանկանում են ապրել մի երկրում, որտեղ տնտեսական գործունեությունը իրականացվում է հավասար իրավունքների տրամադրմամբ, որտեղ չկան արտոնյալներ, չկան գերակայող դիրքեր շուկայում՚, - հավելել է դեսպանը, հաղորդում է «Ազատություն՚ ռադիոկայանը:
Սվիտալսկին համոզմունք է հայտնել, որ Հայաստանի երիտասարդները բավականին առողջ ակնկալիքներ ունեն, միևնույն ժամանակ, նա խորհուրդ է տվել համբերատար լինել: «Պետք է համբերատար լինել, որովհետև նմանատիպ իրադարձություններից հետո, որ տեղի են ունեցել այլ երկրներում, ապացուցվել է, որ նման փոփոխություններ մեկ օրվա ընթացքում անել հնարավոր չէ: Համենայն դեպս, մի բան, որ, վստահաբար, ես նկատել եմ, այն է, որ երիտասարդների դեմքերը փոխվել են, այսօր երիտասարդները ապագային նայում են հույսով: Իսկ մենք կօգնենք այդ հույսը հասցնել իրականության», - ասել է նա:
Անդրադառնալով հարցին, թե արդյոք Հայաստանում տեղի ունեցած իրադարձությունները կնպաստեն Հայաստան-Եվրամիություն հարաբերությունների սերտացմանը, ինչպես նաև վիզաների ազատականացմանը, Պյոտր Սվիտալսկին պատասխանել է, թե համոզված է, որ իրենք ճիշտ ճանապարհին են, և գործընթացը դրական արդյունք է ունենալու:
«Անցած շաբաթ Հայաստան էին ժամանել իմ գործընկերները Եվրամիությունից, օրակարգային հիմնական հարցը եղել է այցագրերի ազատականացման խնդիրը, բայց միաժամանակ եղել է այցագրերի դյուրացման գործընթացի իրականացում, որովհետև Հայաստանի Հանրապետությունը հիմա այդ գործընթացում է գտնվում, և եթե ավարտի, ապա դա լավ սկիզբ կդնի ազատականացման գործընթացը սկսելու համար», - եզրափակել է եվրոպացի դիվանագետը: