Արմինֆո. Վարչապետ Սերժ Սարգսյանը հանդես է եկել ներքաղաքական իրավիճակի վերաբերյալ հայտարարությամբ:
«Անցած շաբաթվա ընթացքում մայրաքաղաք Երևանում տեղի են ունեցել մի շարք ցույցեր և երթեր: Խաղաղ ցույցեր և երթեր անցկացնելու իրավունք ունի մեր երկրի յուրաքանչյուր քաղաքացի: Իշխանությունները հարգել են այդ իրավունքը և շարունակելու են մշտապես հարգել:
Ցավալիորեն, հանրային այդ հավաքները հաճախակիորեն հատել են օրենքով թույլատրվածի սահմանները և ստացել են անհարկի և անարխիկ դրսևորումներ, որոնց մասին մանրամասն խոսվում է Ոստիկանության բազմաթիվ հայտարարությունների մեջ: Տեղի ունեցող զարգացումները հղի են անկանխատեսելի հետևանքներով, վտանգում են հանրային կարգուկանոնը և վնասում Հայաստանի հասարակության բարդ և նուրբ ներդաշնակությունը:
Մեզնից յուրաքանչյուրը պարտավոր է հիշել, որ իրենից բացի այս երկրում ապրում, սովորում, աշխատում և հանգստանում են իրենից ոչ պակաս հպարտ Հայաստանի քաղաքացիներ: Մեր հասարակության ներդաշնակությունը պետք է հիմնվի համերաշխության և հանդուրժողականության վրա:
Խորապես մտահոգված եմ ծավալվող ներքաղաքական զարգացումներով: Անդառնալի կորուստներից խուսափելու նպատակով՝ կոչ եմ անում Ազգային ժողովի պատգամավոր Նիկոլ Փաշինյանին նստել քաղաքական երկխոսության և բանակցությունների սեղանի շուրջ: Դա պետք է անել անհապաղ:
Վստահ եմ, որ իրավիճակին համարժեք նման երկխոսություն ձևավորելուն կարող են նպաստել երկրի բոլոր քաղաքական ուժերը»,- ասված է հայտարարության մեջ:
Փաշինյանն իր հերթին հայտարարել է, որ իշխանության հետ կքննարկի միայն Սերժ Սարգսյանի հրաժարականի պայմանները: «Կոչ եմ անում Սերժ Սարգսյանին ընդունել մեր պահանջները՝ ելնելով իրավիճակի օբյեկտիվ գնահատումից»,- հայտարարել է Փաշինյանը՝ ընդգծելով, որ վենդետաներ չի ուզում: «Հորդորում եմ Սփյուռքի մեր հայրենակիցներին ավելի ակտիվ աջակցություն ցույց տալ մեզ և կոչ անել Սերժ Սարգսյանին՝ հրաժարական տալ: Հատկապես դիմում եմ Սերժ Թանկյանին, Շառլ Ազնավուրին և Սփյուռքի այլ ականավոր գործիչներին: Այսօր Հայաստանում միանգամայն այլ իրավիճակ է ստեղծվել»,- հայտարարել է ընդդիմադիր գործիչը: