Արմինֆո.ԵԱՀԿ Մինսկի խմբի հեռացող համանախագահ Ռիչարդ Հոգլանդի կողմից ղարաբաղյան հակամարտության կարգավորման հիմնական կետերի հրապարակումը Հայաստանի և Ռուսաստանի ղեկավարներ Սերժ Սարգսյանի և Վլադիմիր Պուտինի նախօրեին կայացած հանդիպման հետ կապված չէ և ռուս-ամերիկյան հարաբերություններում ճգնաժամով պայմանավորված չէ: ԱրմԻնֆո-ի թղթակցի հետ զրույցում այդպիսի կարծիք է հայտնել ՀՀ ԱԺ փոխնախագահ Էդուարդ Շարմազանովը:
Նրա խոսքով, հրապարակելով այդ կետերը՝ հեռացող միջնորդը, հնարավոր է, ցանկացել է ամփոփել ԵԱՀԿ ՄԽ շրջանակներում կատարված աշխատանքի արդյունքները: Ինչ վերաբերում է այդ կետերի բովանդակությանը, ԱԺ փոխնախագահը կիսել է Հայաստանի արտաքին քաղաքական գերատեսչության
դիրքորոշումը՝ ընդգծելով, որ դրանցում որևւէ նոր բան չկար: «Այդ կետերն ավելի վաղ նույնպես հրապարակվել են: Որևէ գաղտնի բան դրանցում չկար: Ավելին, բազմիցս ասել ենք, որ կարգավորման հիմքում Մադրիդյան և Կազանյան սկզբունքներն են, որոնք մերժել է ոչ թե հայկական, այլ՝ ադրբեջանական կողմը: Ըստ որում, մենք մշտապես հնչեցրել ենք մեր դիրքորոշումը, որ ղարաբաղյան հակամարտության կարգավորման հիմքում պետք է ընկած լինի Արցախի ժողովրդի ազատ կամարտահայտման իրավունքը: Արցախի անկախությունը պետք է վաղ թե ուշ միջազգայնորեն ճանաչվի»,- ասել է նա:
Նշենք, որ երեկ ուշ երեկոյան ԵԱՀԿ Մինսկի խմբի ամերիկացի համանախագահ Ռիչարդ Հոգլանդը /նրա փոխարեն կնշանակվի Միջազգային կազմակերպություններում Միացյալ Նահանգների առաքելության գործերի ժամանակավոր հավատարմատար Էնդրյու Շեֆերը- խմբ./ հրապարակել է Լեռնային Ղարաբաղի հակամարտության կարգավորման հիմնական կետերը:
«Հաշվի առնելով Լեռնային Ղարաբաղի բարդ պատմությունը, կողմերը պետք է սահմանեն դրա վերջնական իրավական կարգավիճակը ապագայում՝ փոխադարձ համաձայնությամբ եւ իրավական պարտավորեցնող կամարտահայտմամբ:
Նախկին Լեռնային Ղարաբաղի ինքնավար մարզի սահմանների մեջ գտնվող տարածքին, որը Բաքվի կողմից չի վերահսկվում, պետք է ժամանակավոր կարգավիճակ տրվի, որն առնվազն ապահովում է անվտանգության եւ ինքնավարության երաշխիքներ։
Լեռնային Ղարաբաղի շուրջ գրավված տարածքները պետք է հանձնվի Ադրբեջանի վերահսկողությանը։ Այնտեղ չի կարող լինել որեւէ բնակեցում՝ առանց հաշվի առնելու Ադրբեջանի ինքնիշխանությունը։ Այդ տարածքների նկատմամբ Ադրբեջանի ինքնիշխանությունը պետք է վերականգնվի:
Պետք է լինի միջանցք, որը կմիացնի Հայաստանը Լեռնային Ղարաբաղի հետ: Այն պետք է լինի բավականաչափ լայն՝ անվտանգ փոխադրումների ապահովման համար։ Սակայն այն չի կարող ներառել Լաչինի ամբողջ շրջանը:
Հարատեւ կարգավորումը պետք է ճանաչի բոլոր տեղահանված անձանց եւ փախստականների իրավունքը՝ վերադառնալ բնակության նախկին վայր:
Կարգավորումը պետք է իր մեջ ներառի անվտանգության միջազգային երաշխիքներ, որոնք կներառեն խաղաղարար միջոցառումներ: Գոյություն չունի սցենար, որում խաղաղությունը կարող է ապահովված լինել առանց լավ նախապատրաստված խաղաղ գործողությունների, որոնք վայելում են բոլոր կողմերի վստահությունը»,- նշել է համանախագահը:
Արմինֆո. ՀՀ ԱԳՆ ղեկավար Էդվարդ Նալբանդյանը գտնում է, որ ԵԱՀԿ Մինսկի խմբի ամերիկացի համանախագահ Ռիչարդ Հոգլանդը ղարաբաղյան հակամարտության կարգավորման վերաբերյալ որևէ նոր բան չի ասել:
Արմինֆո. ԵԱՀԿ Մինսկի խմբի ամերիկացի համանախագահ Ռիչարդ Հոգլանդի հրապարակած՝ Լեռնային Ղարաբաղի հակամարտության կարգավորման կետերում որևէ նոր կամ հրատապ բան չկա: Այդ մասին ԱրմԻնֆո-ի թղթակցի հետ զրույցում հայտարարել է ՀՀ ԱԳՆ մամուլի քարտուղար Տիգրան Բալայանը:
Արմինֆո. ԵԱՀԿ Մինսկի խմբի ամերիկացի համանախագահ Ռիչարդ Հոգլանդը հրապարակել է Լեռնային Ղարաբաղի հակամարտության կարգավորման հիմնական կետերը, հայտնում է «Ամերիկայի ձայնը»: