Հայ  Рус  Eng
 Նորություններ


 Ուրբաթ, 11 Օգոստոսի 2017 19:34
Անի Մշեցյան

ՀՀ իրավապահ մարմինները զբաղվում են «Տրոպիկա» ՍՊԸ գույքի վնասման գործով

ՀՀ իրավապահ մարմինները զբաղվում են «Տրոպիկա» ՍՊԸ գույքի վնասման գործով

Արմինֆո. ՀՀ իրավապահ մարմինները զբաղվում են Հայաստան բանանի ներկրմամբ զբաղվող «Տրոպիկա» ՍՊԸ գույքի վնասման գործով:

 

Ինչպես ԱրմԻնֆո-ին հայտնել է ՍՊԸ սեփականատեր Վահրամ Միրաքյանը, իրավապահների վարկածով՝անհայտ անձինք ծծմբաթթու էին լցրել ընկերության սառնարանների կոմպրեսորների վրա, սակայն փորձաքննության վերջնական տվյալները դեռ չկան: Ավելի վաղ Միրաքյանը Facebook-ի իր էջում գրել էր, «եթե ընկերության աշխատակիցները ժամանակին գլխի չընկնեին, կփչանար 20 տոննա բանան, որը, սակայն, հասցրել են տեղափոխել այլ սառնարաններ»:

 

ԱրմԻնֆո-ի թղթակցի հետ զրույցում Վահրամ Միրաքյանը հայտարարել է, որ

«Տրոպիկա» ՍՊԸ-ն բանանի ներմուծմամբ է զբաղվում 2016 թ. վերջից, և արդեն հասցրել է 80 տոննա միրգ ներմուծել Ինդոնեզիայից, Ռուսաստանից, Վրաստանից, Էկվադորից: «Մենք երբեք խնդիրներ չենք ունեցել ոչ մաքսատանը, ոչ այլ պետական մարմինների հետ»,- հավաստիացրել է Միրաքյանը՝ ընդգծելով, որ կատարվածն անսպասելի էր իր համար, քանի որ երբեք որևէ մեկի հետ կոնֆլիկտներ չի ունեցել և ավելի վաղ որևէ սպառնալիք չի ստացել: Ըստ որում, գործարարն ընդգծել է, որ կշարունակի զբաղվել երկիր բանանի ներմուծմամբ:

 

Նա նաև նշել է, որ միջադեպի հետևանքով ընկերությունը նյութական լուրջ վնաս չի կրել, քանի որ սառնարաները հաջողվել է լվանալ, և դրանք կրկին սկսել են աշխատել: Միջադեպը գործարարը կապում է իր կոմերցիոն գործունեության հետ, քանի որ անձնական թշնամիներ չունի:   

 

Նշենք, որ Հայաստան բանանի և արևդարձային մրգերի հիմնական ներմուծողը «Քեթրին Գրուպ» ընկերությունն է, որը պատկանում է Հանրապետական կուսակցությունից Ազգային ժողովի պատգամավոր Միհրան Պողոսյանին: Էկվադորից Հայաստան բանանի ներմուծմամբ զբաղվում է նաև «ArmEk trading» ընկերությունը, որը պատկանում է սնանկացած գործարար, Հանրապետական կուսակցությունից նախկին պատգամավոր Աշոտ Աղաբաբյանի փեսային:

  • ԿԱՐԴԱԼ ԲՈԼՈՐ ՄԵԿՆԱԲԱՆՈՒԹՅՈՒՆՆԵՐԸ

Մեկնաբանություւներ չկան

Անուն*
Էլ-փոստ
Տեքստ*
  
4291

 Հարցազրույց
 Մեկնաբանվողներ
 Փնտրել ըստ օրերի