Արմինֆո. Հայաստանի լիազոր կառույցները չեն արձագանքում Իսրայելում սկանդալին՝ կապված հայկական բժշկական բուհերի դիպլոմների հետ:
Իսրայելական The Marker պարբերականի համաձայն, Իսրայելի առողջապահության նախարարությունն արդեն մեկ տարուց ավելի է, ինչ չի հաստատում Հայաստանում կրթություն ստացած ուսանողների դիպլոմները: Ավելին, նախարարությունը դիմել է ոստիկանություն՝ հայկական բժշկական բուհերի կողմից օտարերկրյա ուսանողներին տրված դիպլոմների իրական լինելը պարզելու նպատակով:
Ստեղծված իրավիճակի առնչությամբ պարզաբանումներ ստանալու նպատակով ԱրմԻնֆո գործակալությունը դիմել է որոշ բժշկական բուհերի և լիազոր կառույցների: Սակայն, պարզվել է, որ այդ թեման ընդհանրապես չի հետաքրքրում լիազոր պետական կառույցներին, որոնցից յուրաքանչյուրը փորձել է պատասխանատվույթունը մյուսի վրա բարդել:
Առողջապահության նախարարության մամուլի քարտուղար Անահիտ Հայթայանն ԱրմԻնֆո-ի թղթակցին հայտարարել է, որ այդ հարցը նախարարության լիազորությունների մեջ չի մտնում և խորհուրդ տվել դիմել Կրթության և գիտության նախարարությանը:
Սակայն, Կրթության և գիտության նախարարության մամուլի քարտուղար Լուսինե Մարգարյանը նշել է, որ ԿԳՆ-ն զբաղվում է կրթության ոլորտին առնչվող գլոբալ հարցերով, համակարգի օրենսդրական կարգավորմամբ, այլ ոչ թե՝ առանձին վերցրած ուսումնական հաստատություններով: Մամուլի քարտուղարի խոսքերից կարելի է եզրակացնել, որ հայաստանյան բուհերի միջազգային հեղինակությունը Կրթության և գիտության նախարարության իրավասությունների և լիազորությունների շրջանակի մեջ չի մտնում: Ըստ որում, Մարգարյանը խորհուրդ է տվել այդ հարցով դիմել երկրի բժշկական բուհերին:
Հետևելով նախարարության մամուլի քարտուղարի խորհրդին՝ ԱրմԻնֆո-ն փորձել է մեկնաբանություններ ստանալ Երևանի Մ. Հերացու անվան պետական բժշկական համալսարանում: ԵՊԲՀ մամուլի քարտուղար Շուշան Դանիելյանը հայտարարել է, որ իսրայելական ԶԼՄ-ների տեղեկատվությունը ԵՊԲՀ-ին չի վերաբերում: Ավելին, նրա խոսքով, ԵՊԲՀ-ն Հայաստանում բժշկական կրթություն տրամադրող միակ հաստատություն է, որը Մասնագիտական կրթության որակի ապահովման ազգային կենտրոնի (ՈԱԱԿ)-ի կողմից ստացել է ինստիտուցիոնալ հավատարմագրում: «Ներկա պահին 26 երկրից ավելի քան 1700 ուսանող, այդ թվում՝ նաեւ Իսրայելից, ԵՊԲՀ-ում ստանում է բժշկական կրթություն, իսկ ԵՊԲՀ շրջանավարտներն աշխարհի մոտ 40 երկրում են աշխատում, ինչպես նաև Բժշկական համալսարանի 8000-ից ավելի շրջանավարտներ այսօր հաջողված մասնագիտական գործունեություն են ծավալում տարբեր երկրների բժշկական կազմակերպություններում, որից 4000-ը եկել են տարբեր երկրներից հենց Հայաստանում բժշկական կրթություն ստանալու նպատակով: Վերջին 6 տարիների ընթացքում ԵՊԲՀ-ն ավարտել է 10 իսրայելցի ուսանող, եւ որեւէ խնդիր, դժգոհություն, կապված նրանց հետագա մասնագիտական գործունեության հետ, բուհը չի ստացել»,- հայտարարել է Դանիելյանը:
Ինչ վերաբերում է մասնավոր բժշկական բուհերին, ԱրմԻնֆո-ի թղթակցի հետ զրույցում «Հայկական բժշկական ինստիտուտի» աշխատակազմում հայտարարեցին, որ Իսրայելում ծագած սկանդալը վերաբերում է մեկ այլ մասնավոր ուսումնական հաստատության՝ «Հայբուսակ» համալսարանի կողմից տրամադրված դիպլոմներին: Ինչ վերաբերում է «Հայկական բժշկական ինստիտուտին», ապա բուհի ներկայացուցիչների հավաստմամբ, իրենք երբեք արտերկրից ուսանողներ չեն ունեցել՝ անգլերենով պատշաճ մակարդակի դասավանդող մասնագետներ և օտար լեզուներով անհրաժեշտ ուսումնական նյութի բացակայության պատճառով: Համանման պատասխան է ստացվել նաև մեկ այլ բժշկական բուհից՝ Մեհրաբյանի անվան ինստիտուտից:
Հատկանշական է, որ ստեղծված իրավիճակը հեռախոսով մեկնաբանել
«Հայբուսակում» հրաժարվել են: Նշենք, որ ավելի վաղ իսրայելական The Marker պարբերականը հայտնել էր, որ Իսրայելի ոստիկանությունը ստուգում է երկրի Առողջապահությնա նախարարության ներկայացրած բողոքը՝ կապված՝Հայաստանում տրամադրվող բժշկական բուհերի դիպլոմների հետ: Իսրայելի առողջապահությա նախարարությունը կասկածում է, որ այդ փաստաթղթերը կարող են կեղծ լինել: Հաղորդվում է մի ամբողջ ինդուստրիայի գործունեության մասին, որը Հայաստան է տեղափոխում արաբ ուսանողներին, ովքեր չեն կարողացել շարունակել իրենց ուսուցումը հայտնի համալսարաններում և իրենց կրթությունն ավարտում են Հայաստանում: Ինչպես The Marker-ին հայտնել է Ատամնաբույժների ասոցիացիայի արաբական սեկտորի ղեկավար Փհարի Հասանը, Իսրայելում հատուկ գործակալներ են գործում, ովքեր գտնում են այն արաբ ուսանողներին, որոնք բժշկություն կամ ատամնաբուժություն են սովորում այնպիսի երկրներում, ինչպիսին են՝ Հորդանանը, Գերմանիան կամ Իտալիան, և որոնց չի հաջողվել ուսումն ավարտել: Գործակալները (նույնպես արաբական հատվածից) ձախողված ուսանողներին առաջարկում են Հայաստան տեղափոխվել, որը ներառում է կեցավայրը և որոշակի վճարի դիմաց տեղական համալսարաններում սովորելը:
Ուսանողները Հայաստան են ժամանում, որտեղ նրանց է սպասում այդ ինդուստրիայի ներկայացուցիչը, նույնպես արաբ, որը հոգում է նրանց պահանջմունքները: Հաստատություններում, որտեղ նրանք սկսում են ուսումը, պարտադիր չէ վերահանձնել անցած կուրսը: Նրանք դիպլոմներ են ստանում հինգ տարի ուսման համար, սակայն պարզ չէ, թե արդյոք նրանք ընդհանրապես սովորել են այդ համալսարաններում: Պարբերականը նշում է, որ այդ վկայությունների հիման վրա Իսրայելի Առողջապահության նախարարությունն արդեն ավելի քան մեկ տարի է, ինչ չի հաստատում Հայաստանից վերադարձած ուսանողների դիպլոմները: Իսրայելում նաև հատուկ նախազգուշացում է արվել, որ Հայաստանում կրթություն ստանալ ցանկացողները պետք է հաշվի առնեն, որ իրենց դիպլոմները կարող են չընդունվել: Պարբերականին հայտնել են նաև, որ Հայաստանի իշխանությունները վերջերս սկսել են հետաքննել այդ հարցը՝ արաբական տարբեր երկրներից ուսանողների և իսրայելցիների մեծ հոսք հայտնաբերելուց հետո:
ԿԱՐԴԱԼ ԲՈԼՈՐ ՄԵԿՆԱԲԱՆՈՒԹՅՈՒՆՆԵՐԸ