Արմինֆո.ՀՀ ոստիկանությունը տեղեկատվություն է տարածել հայազգի Զավեն Կարապետյան անուն-ազգանունով անձի գերեվարման մասին:
«Ադրբեջանական զանգվածային լրատվության միջոցներով տեղեկություն էր տարածվել հայազգի Զավեն Կարապետյան անուն-ազգանունով անձի գերեվարվելու մասին։ ՀՀ ոստիկանության կողմից կատարված ստուգումներով եւ ուսումնասիրությամբ պարզվել է, որ տարածված անձնական տվյալները համընկնում են Վանաձորի Մայմեխի 1 հասցեում գտնվող ծերանոցում հաշվառված, 16․11․1974 թ․ ծնված Զավեն Կարապետյանի տվյալների հետ։
Զ․Կարապետյանը ծնվել է Նոր Խարբերդ ավանում։ Մայրը` Մ. Կարապետյանը, եղել է Խարբերդի հաշմանդամների տան շահառու։ 1978 թ․ Զավեն Կարապետյանն ընդունվել է Գավառի մանկատուն, որտեղից դուրս է գրվել 1982 թ․ եւ տեղափոխվել մայրաքաղաքի Սովետաշենի օժանդակ դպրոց։ 1994 թ․ աշնանը Զ․Կարապետյանը տեղափոխվել է Վանաձոր քաղաք եւ մոտ 4 տարի բնակվել Շառլ Ազնավուրի հիմնադրամի կողմից տրամադրված տնակում` օժանդակ դպրոցի նախկին սաներից մեկի հետ, հետո միայնակ է բնակվել Վանաձորի «Արմենիաե առողջարանի տարածքում տեղադրված եւ իրեն հատկացված տնակում։ Հաշվառման վայր չունենալու պատճառով 2004 թ․ հաշվառվել է Վանաձորի Մայմեխի 1 հասցեում գտնվող ծերանոցում եւ նույն թվականին Վանաձորի անձնագրային բաժանմունքի կողմից ստացել անձնագիր։ Անձնագրի վավերականացման տասնամյա ժամկետը լրանալուց հետո չի դիմել նոր անձնագիր ստանալու համար։
Զ․Կարապետյանը ՀՀ զինված ուժերում չի ծառայել, քանի որ առողջական խնդիրներ է ունեցել (մտավոր հետամնացություն) եւ ՀՀ պաշտպանության նախարարի համապատասխան հրամանի համաձայն՝ 24․12․1993 ազատվել է ծառայությունից։ Զ․Կարապետյանը հետագայում ապամոնտաժել եւ վաճառել է իր տնակը եւ դրանից հետո վարել թափառական կյանք, մշտական բնակության վայր չի ունեցել։ Ըստ ստացված տեղեկությունների՝ ՀՀ տարբեր տարածքներում վարձատրության դիմաց անասնապահությամբ է զբաղվել։ Խուսափել է շփումներից, եղել է ինքնամփոփ, առերեւույթ ակնհայտ են եղել մտավոր թերություններ»,- ասվում է ոստիկանության պարզաբանման մեջ:
Նշենք, որ հունիսի 21-ի առավոտյան Ադրբեջանի պաշտպանության նախարարությունը տարածել է տեղեկատվություն, որ հունիսի 20-ի երեկոյան Հայաստանի և Ադրբեջանի սահմանին, իբր, գերի է վերցվել հայկական զինված ուժերի զինծառայողը: Մինչդեռ Հայաստանի պաշտպանության նախարարությունը հերքել է տեղեկատվությունը: Ավելի ուշ Ադրբեջանի ՊՆ-ն տարածել է քաղաքացիական հագուստով մի տղամարդու հարցաքննության տեսագրություն, ում վրա կար թուրքական զրահաբաճկոն: Տեսանյութում այդ տղամարդը վատ հայերենով տալիս է ցուցմունքներ, ընդ որում՝ վատ ձայնագրության հետևանքով ոչ բոլոր բառերն են լսվում: Նա նաև հայտարարում է, որ ինքը Նոյեմբերյանի Դովեղ գյուղի բնակիչ է: Սակայն, այդ գյուղում երբեք չի ապրել նման անուն և ազգանունով մարդ: Ընդհակառակը, նման մարդ բնակվել է Վանաձորում: Ավելի ուշ հայտնի է դարձել, որ նման անձը գրանցված է Վանաձորի Մայմեխի մայրուղու վրա գտնվող հասցեում, որտեղ տեղակայված է ծերանոցը: