Երեթշաբթի, 23 Մայիսի 2017 11:04

Արմինֆո.«Ավրորա» մարդասիրական նախաձեռնությունը, որը հիմնադրվել է Հայոց ցեղասպանությունը վերապրածների անունից եւ ի երախտագիտություն նրանց փրկողների, հայտարարել է «Մադրիդյան ակումբ» համաշխարհային առաջնորդության միության հետ համագործակցության մասին, որը երկրների եւ կառավարությունների նախկին ղեկավարների ամենամեծ անկախ ֆորումն է:

Համագործակցությունը, որը մեկնարկել է 2017թ. մայիսի 1-ին, նպատակ ունի ոգեշնչելու այնպիսի գործողություններ, որոնք ուղղված կլինեն հումանիտար օժանդակություն կարիք ունեցողներին օգնելուն:

 

Որպես պայմանագրի մաս` Մադրիդի ակումբի անդամներ Տանզանիայի նախկին նախագահ Բենջամին Մկապան եւ Բոթսվանայի նախկին նախագահ Ֆեստուս Մոգաեն կմասնակցեն Երեւանում կայանալիք «Ավրորա» մրցանակի շնորհման արարողությանը: Աֆրիկյան այս երկու առաջնորդներն անմիջական մասնակցություն են ունեցել Աֆրիկայում, հաստկապես Սուդանում, հակամարտությունների կարգավորման գործում: Երեւանում նրանք քննարկումներ կունենան հումանիտար ոլորտի ներկայացուցիչների, հետազոտողների, մեդիա ոլորտի մասնագետների եւ քաղաքական գործիչների հետ` խաղաղապահության եւ «խաղաղության կառուցման» արդյունավետ մոտեցումների ու բարեփոխումների շուրջ, ինչպես նաեւ այս գործընթացում տնտեսական զարգացման կարեւորության մասին:

 

«Ավրորա» մրցանակը համաշխարհային մրցանակ է, որը հիմնադրվել է «Ավրորա» մարդասիրական նախաձեռնության կողմից եւ շնորհվում է այն անհատներին, ովքեր իրենց գործունեության միջոցով բացառիկ ազդեցություն են ունենում մարդկային կյանքի պահպանման եւ հումանիտար խնդիրների առաջ մղման գործում: Նախագահներ Մկապան եւ Մոգաեն Երեւանում կողջունեն 2017թ. «Ավրորա» մրցանակի դափնեկրին, ով կստանա 100.000 ԱՄՆ դոլարի պարգեւ՝ շարունակելու իր գործունեությունը, ինչպես նաեւ հնարավորություն կունենա առաջադրել իրեն գործի մղած կազմակերպություններին՝ ստանալու 1 միլիոն դոլարի  դրամաշնորհ: 2017թ. «Ավրորա» մրցանակի հավակնորդներն են` Ֆարթուն Ադան եւ Իլվադ Էլման, Ջամիլա Աֆղանի, Թոմ Քաթինա, Մուհամադ Դարվիշ եւ Դենիս Մուկվեգե:

 

«Մենք մշտապես ցանկանում ենք համագործակցել այնպիսի կազմակերպությունների հետ, որոնք հավատում են մեր առաքելությունը: «Մադրիդյան ակումբի» աջակցությունը շատ օգտակար կլինի՝ հնարավորություններ ստեղծելու մարդկային կյանքը փրկելու, կարիքավորներին հույս տալու եւ համաշխարհային հումանիտար գործունեություն ոգեշնչելու համար,- ասել է Ավրորա մարդասիրական նախաձեռնության համահիմնադիր Ռուբեն Վարդանյանը, - մեզ համար պատիվ է՝ աշխատելու այսպիսի հեղինակավոր միջազգային կազմակերպությունների հետ` առաջ մղելով մեր ընդհանուր նպատակը, այն է` մարդասիրական խնդիրների վերաբերյալ իրազեկվածության բարձրացումը եւ ամբողջ աշխարհում ճգնաժամերին ու անարդարությանը արդյունավետ լուծումներ գտնելը»:

 

«Մադրիդյան ակումբը», որին անդամակցում են 100-ից ավելի նախկին նախագահներ ու վարչապետներ՝ շուրջ 70 երկրներից, այսօրվա առաջնորդներին աջակցում է երկու հիմնական ոլորտներում` ժողովրդավարական առաջնորդություն ու կառավարում եւ ճգնաժամերին ու հետճգնաժամային իրավիճակներին պատասխաններ գտնելու ոլորտներում:

 

«Շատ բազմազան մասնակիցներով մեր կազմակերպության եւ «Ավրորա» մարդասիրական նախաձեռնության ընդհանրությունն այն խնդիրների ու մարտահրավերների գիտակցումն է, որոնց առջեւ կանգնած է աշխարհը, ինչպես նաեւ առաջնորդության եւ քաղաքացիական մասնակցության միջոցով դրական փոփոխությունների խթանման հանդեպ մեր խորագույն հանձնառությունը,- ասել է «Մադրիդյան ակումբի» գլխավոր քարտուղար Մարիա Էլենա Ագուերոն, - մենք հպարտ ենք, որ մեր փորձառությունը, մասնագիտական գիտելիքները եւ ընդհանուր ուժը կարող է խորացնել այն հսկայական ազդեցությունը, որ «Ավրորա» մարդասիրական նախաձեռնությունն ունենում է աշխարհի տարբեր անկյուններում»:

 

 «Ավրորա» մարդասիրական նախաձեռնությունը, որն ստեղծվել է Հայոց ցեղասպանությունը վերապրողների անունից՝ ի երախտագիտություն նրանց փրկողների, ձգտում է հնարավորություն տալ մերօրյա հերոսներին՝ կյանք եւ հույս պարգեւել նրանց, ովքեր մարդասիրական աջակցության խիստ կարիք ունեն, այսպիսով՝ շարունակել մարդասիրության շղթան աշխարհով մեկ: «Ավրորա» մարդասիրական նախաձեռնությունը գործով արտահայտված երախտագիտություն է: Այն նպատակ ունի ութ տարի շարունակ (2015-2023թթ.՝ ի հիշատակ ութ տարի տեւած Հայոց ցեղասպանության՝1915-1923թթ.) աջակցել մարդկանց, ովքեր վտանգելով իրենց կյանքը` կնպաստեն այնպիսի նախագծերի իրագործմանը, որոնք կբարելավեն առավել կարիքավոր եւ աղքատ մարդկանց կյանքը: Սա իրագործվում է նախաձեռնության տարբեր ծրագրերի օգնությամբ՝ «Ավրորա» մրցանակ, Aurora Dialogues քննարկումների շարք, «Ավրորա» մարդասիրության ցուցիչ, Երախտագիտության նախագծեր եւ 100 LIVES ծրագիր: «Ավրորա» մարդասիրական նախաձեռնությունը Վարդան Գրեգորյանի, Նուբար Աֆեյանի եւ Ռուբեն Վարդանյանի մարդասիրական ձեռնարկումն է, որոնց արդեն երկրորդ տարում միացել են մի քանի տասնյակ նվիրատուներ եւ գործընկերներ: Նախաձեռնությունն իր շուրջ է հրավիրում բոլորին, ովքեր ողջունում են նվիրվածությունը մեր համընդհանուր մարդկայնությանը: «Ավրորա» մարդասիրական նախաձեռնությունը ներկայացված է երեք կազմակերպությունների կողմից՝ Aurora Humanitarian Initiative հիմնադրամ (Նյու Յորք, ԱՄՆ), 100 Lives հիմնադրամ (Ժնեւ, Շվեյցարիա) եւ IDeA հիմնադրամ (Երեւան Հայաստան):

 

«Մադրիդյան ակումբն» անկախ, շահույթ չհետապնդող կազմակերպություն է 70 ժողովրդավարական երկրների ավելի քան 100 նախկին նախագահների ու վարչապետների անդամակցությամբ: «Մադրիդյան ակումբն» արձագանքում է ժողովրդավարական կառավարման ոլորտում առաջացող խնդիրներին` առաջնորդվելով իր անդամների փորձառությամբ ու արժեքավոր առաջնորդությամբ: «Մադրիդյան ակումբն» աշխատում է ուժեղացնել ժողովրդավարական ինստիտուտները  եւ խորհրդատվություն տրամադրել քաղաքական հակամարտությունների կարգավորման ոլորտում` նպատակ ունենալով ընդլայնել զարգացումն ու բարելավել կարիքավորների կյանքը: Ավելին՝ «Մադրիդյան ակումբն» աջակցում է քաղաքականապես կայուն լուծումներին այնպիսի մարտահրավերների համար, որոնց բախվում են այսօրվա առաջնորդները` տրամադրելով գործնական խորհրդատվություն, գործողությունների ծրագրեր եւ դրանց իրականացման ռազմավարություններ: